سوزاق اۋدانىندا اعىمداعى جىلدىڭ 9 ايىندا جالپى وڭىرلىك ءونىم كولەمى 285 ملرد 972 ملن تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 13،9 پايىزعا وسكەن. سونداي-اق، اۋدان ەكونوميكاسىنا 9 ايدا 34 ملرد 206 ملن تەڭگە ينۆەستيسيا تارتىلدى. بۇل تۋرالى بريفينگتە سوزاق اۋدانىنىڭ اكىمى سالىحان پولاتوۆ مالىمدەدى، – دەپ حابارلايدى Dalanews.kz تۇركىستان وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

اۋداننىڭ اۋىل شارۋاشىلىعى سالاسىنداعى جالپى ءونىم كولەمى 9 ايدا 12 ملرد 545 ملن 500 مىڭ تەڭگەگە جەتكەن.

– اۋىل شارۋاشىلىعىنىڭ نەگىزگى كاپيتالىنا 292،4 ملن تەڭگە ينۆەستيسيا تارتىلدى. اۋدان بويىنشا بيىلعى جىلى 13 280 گەكتار القاپقا ەگىس ەگىلدى. ونىڭ ىشىندە: 350 گەكتار – بيداي، 1 230 گەكتار – ارپا، 1 202 گەكتار – ماقسارى، 897 گەكتار – جۇگەرى، 518 گەكتار – كارتوپ، 506 گەكتار – كوكونىس، 508 گەكتار – باقشا، 8 069 گەكتار – مال ازىعى داقىلدارى. سونىمەن قاتار، شولاققورعان، سوزاق، سىزعان اۋىل وكرۋگتەرىنىڭ اگروقرىلىمدارى 186 گەكتار القاپقا جاڭبىرلاتىپ سۋارۋ جۇيەسىن ورناتتى، – دەدى سالىحان سابىر ۇلى.



2021 جىلدىڭ 9 ايىندا جايىلىمداردى سۋمەن قامتۋ ماقساتىندا 74 قۇدىق قازىلىپ، ولارعا 847 ملن 640 مىڭ 500 تەڭگە سۋبسيديا تولەنگەن.