سوت جۋرناليست دۋمان مۇحاممەدكارىمدى ءۇيقاماققا جىبەرۋدەن باس تارتتى

كوركەم الدابەرگەنوۆا 12 اقپ. 2024 16:11 2340

بۇگىن قونەايەۆتا جۋرناليست دۋمان مۇحامەدكارىمنىڭ سوتى باستالدى. ءبىراق سوتقا ب ا ق وكىلدەرى كىرگىزىلمەگەن. پروكۋرور سوت جابىق ءوتۋىن سۇراعاندىقتان سۋديا ءوتىنىشتى قاناعاتتاندىرعان، - دەپ حابارلايدى Dalanews.kz ازاتتىققا سىلتەپ. 

العاشقى وتىرىستا دۋمان مۇحامەدكارىمنىڭ ادۆوكاتى جالعاس ساپارحانوۆا سۋدياعا سەنىمسىزدىك ءبىلدىردى. بۇعان قوسا، قورعاۋشى سوتتى اشىق وتكىزۋدى جانە ىسپەن تولىق تانىسۋدى سۇرادى. دۋمان مۇحاممەدكارىم ءالى كۇنگە دەيىن ايىپتاۋ اكتىسىمەن دە، سوت قۇجاتتارىمەن دە تانىسپاعانىن ايتىپ، سوتتان ىسپەن تانىسۋعا 15 كۇن بەرۋدى جانە ءوزىن ءۇيقاماققا شىعارۋدى سۇرادى. ءبىراق سوت ءجۋرناليستى ءۇيقاماققا شىعارۋدان باس تارتتى.

العاشقى وتىرىس بىتكەن سوڭ جۋرناليست مالىمدەمە جاسادى.

"بۇل - مەنىڭ ايىبىم ەمەس. ايىپپەن قوسىلمايمىن. مەنىڭ اۋزىمدى جابۋ ءۇشىن ويدان قۇراستىرعان ايىپ"، - دەدى دۋمان مۇحاممەدكارىم.

سوت وتىرىسىنا ءجۋرناليستىڭ جاقتاستارى كوپتەپ كەلگەن. ءبىراق كوبى سوت وتىرىسى ءوتىپ جاتقان زالعا كىرە الماعان.جينالعاندار "بوستاندىق!" دەپ ايعايلاعان.  

وتىرىستان سوڭ ادۆوكات ساپارحانوۆا دۋمان مۇحاممەدكارىممەن كەزدەسىپ شىقتى. قورعاۋشىنىڭ ايتۋىنشا، ءجۋرناليستى قونايەۆ قالاسىنان تالدىقورعان قالاسىنداعى قاماۋ يزولياتورىنا قايتادان الىپ كەتكەن.

"دۋماندى الداعى ۋاقىتتا سوتقا تالدىقورعاننان ونلاين قاتىستىرۋى دا مۇمكىن. دۋمان وتىرىستىڭ جابىق وتەتىنىنە، ءوزىن تالدىقورعانعا الىپ كەتكەنىنە نارازى. ول "مەنى سوتقا ونلاين قوسسا تاڭ قالماڭىزدار" دەپ وتىر، ءبىراق دۋمان كۇرەسىمدى جالعاستىرامىن دەيدى. بىزگە قونايەۆ قالاسى پوليسيا دەپارتامەنتىندەگى ۋاقىتشا ۇستاۋ يزولياتورىنىڭ قىزمەتكەرلەرى سوت 19 اقپاننان 29 اقپانعا اۋىستىرىلعانىن ايتتى" دەيدى ساپارحانوۆا.

ايتا كەتەيىك، "Ne Deidi" Youtube-كانالىنىڭ اۆتورى، جۋرناليست دۋمان مۇحاممەدكارىم "ەكسترەميزمدى قارجىلاندىردى" جانە "تىيىم سالىنعان ۇيىمنىڭ جۇمىسىنا ارالاستى" دەگەن كۇدىكپەن قاماۋعا الىنعان. ىسكە ءجۋرناليستىڭ شەتەلدە تۇراتىن "قازاقستاننىڭ دەموكراتيالىق تاڭداۋى" قوزعالىسىنىڭ جەتەكشىسى، وپپوزيسيونەر مۇحتار ءابليازوۆتان العان سۇحباتى سەبەپ بولعان. جۋرناليست ماۋسىمنان بەرى قاماۋدا وتىر.


ۇسىنىلعان
سوڭعى جاڭالىقتار
x