قازىرگى ۋاقىتتا وسىنداي وزگەرىستى قامتيتىن زاڭ جوباسىنىڭ تۇجىرىمداماسى ازىرلەنىپ، زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا تاراپىنان ماقۇلدانعان.

قازاقستاندا سوسياليستىك ەڭبەك ەرىنىڭ جاردەماقىسى «حالىق قاھارمانى» جانە «قازاقستاننىڭ ەڭبەك ەرى» اتاعىن يەلەنۋشىلەردىڭ جاردەماقىسىمەن تەڭەستىرىلمەك. بۇل جايىندا ءماجىلىس دەپۋتاتتارىنىڭ ساۋالىنا بەرىلگەن ق ر پرەمەر-مينيسترى اسقار ءماميننىڭ جاۋابىندا ايتىلدى، دەپ حابارلايدى قازاقپارات.

– بۇگىنگى كۇنى ەكىنشى دۇنيەجۇزىلىك سوعىسقا قاتىسۋشىلاردىڭ قاتارىنداعى سوسياليستىك ەڭبەك ەرلەرى ءۇشىن ارناۋى مەملەكەتتىك جاردەماقى 74،65 اەك-تى نەمەسە 197 898 تەڭگەنى، «ەڭبەك داڭقى» وردەنىنىڭ ىىى-دارەجەسىنە يە سوسياليستىك ەڭبەك ەرلەرىنىڭ جاردەماقىسى 9،60 اەك-تى نەمەسە 25 450 تەڭگەنى (2020 جىلى) قۇرايدى. سوسياليستىك ەڭبەك ەرلەرىنە بەلگىلەنگەن جاردەماقىنى قايتا قاراستىرۋ ۇسىنىسى وزەكتى ەكەندىگى ءسوزسىز.

وسىعان وراي ۇكىمەت «قازاقستان رەسپۋبليكاسىنىڭ الەۋمەتتىك قامتاماسىز ەتۋ ماسەلەلەرى بويىنشا كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىن ازىرلەۋگە باستاما جاسادى. ونىڭ اياسىندا سوسياليستىك ەڭبەك ەرلەرى مەن «ەڭبەك داڭقى» وردەنى يەگەرلەرىنىڭ قىزمەتتەرى مەن جانكەشتى ەڭبەكتەرىن مويىنداۋ ماقساتىندا ولارعا بەرىلەتىن ارناۋلى مەملەكەتتىك جاردەماقى كولەمىن «حالىق قاھارمانى» مەن «قازاقستاننىڭ ەڭبەك ەرى» اتاعىن يەلەنگەندەرگە بەرىلەتىن 138،63 اەك-كە نەمەسە 367 508 تەڭگەگە (2020 جىلى) دەيىن ارتتىرۋ شارالارى قاراستىرىلعان، – دەپ اتاپ وتەدى ۇكىمەت باسشىسى.

ونىڭ ايتۋىنشا، قازىرگى ۋاقىتتا زاڭ جوباسىنىڭ تۇجىرىمداماسى ازىرلەنىپ، زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا تاراپىنان ماقۇلدانعان. رەسپۋبليكالىق بيۋدجەتتىك كوميسسيا دا مەملەكەتتىك بيۋدجەتتەن قوسىمشا شىعىستارعا قولداۋ ءبىلدىرىپ وتىر.

– اتالعان زاڭ جوباسى بەلگىلەنگەن تارتىپپەن مەملەكەتتىك ورگانداردا كەلىسىم پروسەدۋراسىنان ءوتىپ جاتىر جانە ق ر ۇكىمەتىنىڭ 2020 جىلعا ارنالعان زاڭ جوبالاۋ جۇمىسى جوسپارىنا سايكەس، وسى جىلدىڭ ساۋىرىندە ق ر پارلامەنتى قاراۋىنا ەنگىزۋ كوزدەلگەن، – دەدى اسقار مامين.