Qazaqstanda Sosıalısik Eńbek Eriniń járdemaqysy «Halyq Qaharmany» jáne «Qazaqstannyń Eńbek Eri» ataǵyn ıelenýshilerdiń járdemaqysymen teńestirilmek. Bul jaıynda Májilis depýtattarynyń saýalyna berilgen QR Premer-mınıstri Asqar Mamınniń jaýabynda aıtyldy, dep habarlaıdy QazAqparat.
– Búgingi kúni Ekinshi dúnıejúzilik soǵysqa qatysýshylardyń qataryndaǵy Sosıalısik Eńbek Erleri úshin arnaýy memlekettik járdemaqy 74,65 AEK-ti nemese 197 898 teńgeni, «Eńbek dańqy» ordeniniń İİİ-dárejesine ıe Sosıalısik Eńbek Erleriniń járdemaqysy 9,60 AEK-ti nemese 25 450 teńgeni (2020 jyly) quraıdy. Sosıalısik Eńbek Erlerine belgilengen járdemaqyny qaıta qarastyrý usynysy ózekti ekendigi sózsiz.
Osyǵan oraı Úkimet «Qazaqstan Respýblıkasynyń áleýmettik qamtamasyz etý máseleleri boıynsha keıbir zańnamalyq aktilerine ózgertýler men tolyqtyrýlar engizý týraly» QR zańynyń jobasyn ázirleýge bastama jasady. Onyń aıasynda Sosıalısik Eńbek Erleri men «Eńbek dańqy» ordeni ıegerleriniń qyzmetteri men jankeshti eńbekterin moıyndaý maqsatynda olarǵa beriletin arnaýly memlekettik járdemaqy kólemin «Halyq Qaharmany» men «Qazaqstannyń Eńbek Eri» ataǵyn ıelengenderge beriletin 138,63 AEK-ke nemese 367 508 teńgege (2020 jyly) deıin arttyrý sharalary qarastyrylǵan, – dep atap ótedi Úkimet basshysy.
Onyń aıtýynsha, qazirgi ýaqytta zań jobasynyń tujyrymdamasy ázirlenip, zań jobalaý qyzmeti máseleleri jónindegi vedomstvoaralyq komısıa tarapynan maquldanǵan. Respýblıkalyq búdjettik komısıa da memlekettik búdjetten qosymsha shyǵystarǵa qoldaý bildirip otyr.
– Atalǵan zań jobasy belgilengen tártippen memlekettik organdarda kelisim prosedýrasynan ótip jatyr jáne QR Úkimetiniń 2020 jylǵa arnalǵan zań jobalaý jumysy josparyna sáıkes, osy jyldyń sáýirinde QR Parlamenti qaraýyna engizý kózdelgen, – dedi Asqar Mamın.
