ەل دامۋىنىڭ الەۋمەتتىك ەكونوميكالىق كورسەتكىشىن ەسەپتەپ شىعارعان مينيسترلىكتىڭ مالىمەتىنشە، ونەركاسىپتىڭ وسىمىنە كومىر، ليگنيت، مۇناي، تابيعي گاز، مەتالل كەندەرى، مۇناي وڭدەۋ جانە مەتاللۋرگيا ونىمدەرىن ءوندىرۋ ايتارلىقتاي اسەر ەتكەن.
سونداي-اق وڭدەۋشى ونەركاسىپتىڭ 5،2 پايىزعا ۇلعايۋى ەسەبىنەن وتاندىق دارى-دارمەك ءوندىرىسى، توقىما بۇيىمدارى، قاعاز ونىمدەرى، ازىق-تۇلىك جانە سۋسىن ءوندىرۋ سالاسىندا قارقىندى ءوسىم بايقالعان. بۇدان سىرت جيھاز ءوندىرىسى، مەتاللۋرگيا ونەركاسىبى جانە ماشينا جاساۋ قارىشتاپ دامىعان.
ال رەسپۋبليكا بويىنشا، ونەركاسىپتىڭ تامىرىنا قان جۇگىرتكەن وڭىرلەردىڭ كوش باسىندا اتىراۋ وبلىسى تۇر. بۇدان كەيىن باتىس قازاقستان وبلىسى مەن استانا قالاسى جوعارعى كورسەتكىشتى جالعاستىرادى.
بۇدان باسقا اۋىلشارۋاشىلىعىنىڭ جالپى ءونىم كولەمى دە ءبىرشاما ارتقان. اسىرەسە پاۆلودار، ماڭعىستاۋ جانە قىزىلوردا وبلىستارى مال شارۋاشىلىعى ونىمدەرىن وندىرۋگە ەلەۋلى ۇلەس قوسقان.
ايتا كەتەلىك، بۇدان بۇرىن ينۆەستيسيالار جانە دامۋ ءمينيسترى جەڭىس قاسىمبەك
قازاقستاندا وندىرىلەتىن ونىمدەر الەمنىڭ 110 ەلىنە ەكسپورتتالاتىنىن ايتقان بولاتىن. «بۇگىنگى تاڭدا وڭدەۋشى ونەركاسىپتىڭ قازاقستاندىق ونىمدەرى 110 ەلگە ەكسپورتتالىپ جاتىر. كەيبىر تاۋار پوزيسياسى بويىنشا وتكىزۋدىڭ تىڭ نارىعى اشىلعان. العاشقى التى ايدا «ازيا-اۆتو» كومپانياسى وندىرەتىن اۆتوكولىكتىڭ 672ء-ى جۇڭگو مەن باا-گە جونەلتىلدى. قىتايلىق ارىپتەستەرمەن بىرلەسە قۇراستىرىلعان قوستانايداعى اۆتوكولىكتەر تاجىكستانعا ەكسپورتتالا باستادى. اۋىلشارۋاشىلىعى تەحنيكاسى تۇڭعىش رەت رەسەي نارىعىنا جول تارتتى. لوكوموتيۆتەر ەكسپورتى تاجىكستان مەن ازەربايجان ەلىنە دە جولعا قويىلىپ، 40-قا جۋىق لوكوموتيۆتى وتكىزدىك. بۇل ءتىزىمدى ودان ارى دا جالعاستىرا بەرۋگە بولادى»، – دەگەن ەدى ۆەدومستۆو باسشىسى.
جەڭىس قاسىمبەك سونىمەن بىرگە يندۋستريالىق دامۋ باعدارلاماسىنىڭ ارقاسىندا جالپى ەكونوميكا مەن ونەركاسىپتىڭ قۇرىلىمى وزگەرىپ كەلە جاتقانىن دا تىلگە تيەك ەتكەن.
«وڭدەۋشى سەكتوردىڭ ەل ەكونوميكاسىنىڭ دامۋىنداعى ۇلەسى 2010 جىلى 11،3 پايىزعا، 2017 جىلدىڭ 7 ايىنىڭ كورسەتكىشى بويىنشا 12 پايىزعا جەتتى. بۇل دەگەنىڭىز، يندۋستريالاندىرۋ باعدارلاماسى، شىنىندا دا، قازاقستاننىڭ ەكونوميكاسىنا اسەرىن تيگىزەتىنىن كورسەتىپ وتىر. وڭدەۋشى ونەركاسىپتىڭ ۇلەسى 2010 جىلى 30،5 پايىزعا، 2017 جىلىدڭ 7-8 ايى بويىنشا 41،1 پايىزعا ءوستى»، – دەگەن ەدى مينيستر.
ايتپاقشى، قازاقستان ەكونوميكانىڭ – شيكىزاتتىق ەمەس سەكتورىن دامىتۋ جۇمىستارىن بارىسىن تىكەلەي «نۇر وتان» پارتيا قاتاڭ باقىلاۋدا. ەلىمىزدىڭ جەتەكشى پارتياسى ءوزىنىڭ سايلاۋالدى باعدارلاماسىندا ناقتى كورسەتىلگەن بازالىق سالالار مەن يننوۆاسيانى دامىتۋ مىندەتتەرىن جۇزەگە اسىرۋ باعىتىنداعى جۇمىستاردى جۇرگىزۋدە. بۇعان ساي 2021 جىلى ەلىمىزدە ءتۇرلى-تۇستى مەتاللۋرگيا ەكسپورتى 20 پايىزعا وسەدى دەپ كۇتىلىپ وتىر. سونداي-اق مۇناي-گاز سالاسىندا باسەكەگە قابىلەتتىلىك ارتىپ، ەنەرگيامەن قامتاماسىز ەتەتىن كاسىپورىنداردىڭ اياسى كەڭەيمەك.
پارتيا باسشىسى مۇحتار قۇل-مۇحاممەدتىڭ ايتۋىنشا، ەلباسىنىڭ تاپسىرماسىمەن يندۋستريالىق-يننوۆاسيالىق دامۋ باعدارلاماسى اياسىندا وسى كۇنگە دەيىن 1000-نان استام جاڭا كاسىپورىن سالىنعان. ونى جۇزەگە اسىرۋعا 5 تريلليون تەڭگەدەن استام قاراجات بولىنگەن.
