كەزدەسۋ جەڭىسكە ارنالعان دەرەكتى فيلم كورسەتۋدەن باستالدى. ارداگەرلەردى قۇتتىقتاعان وبلىس اكىمى ا. باتالوۆ مايدانگەرلەر مەن تىل ەڭبەككەرلەرىنىڭ بۇگىنگى بەيبىت ومىرگە جەتۋ جولىنداعى ۇلكەن ۇلەسىن ەرەكشە اتاپ ءوتتى.
– قۇرمەتتى ارداگەرلەر! بارشاڭىزدى الدا كەلە جاتقان ۇلى جەڭىس كۇنىمەن شىن جۇرەكتەن قۇتتىقتايمىن! سىزدەردىڭ دەنساۋلىقتارىڭىز بەن تۇرمىستارىڭىزعا قامقورلىق كورسەتۋ – پرەزيدەنتىمىز نۇرسۇلتان ءابىش ۇلى نازاربايەۆتىڭ الدىمىزعا قويعان مىندەتتەرىنىڭ ءبىرى. دەنساۋلىقتارىڭىز كۇتىمدە، عۇمىرلارىڭىز يگىلىكتى بولۋى ءۇشىن، امان-ەسەن ورتامىزدا ءجۇرىپ، ەلدىڭ وسىپ-وركەندەگەنىنە كۋا بولۋلارىڭىز ءۇشىن ءبىز بارلىق جاعدايدى جاساۋعا تىرىسامىز. ەلىمىزدىڭ بۇگىنگىدەي جەتىستىكتەرگە جەتۋىنە سىزدەردىڭ قوسقان ۇلەستەرىڭىز زور. وبلىستىڭ الەۋمەتتىك-ەكونوميكالىق دامۋىن سىرتتاي باقىلاپ، قاجەت جەرىندە اقىل قوسىپ، ۇنەمى قولداپ وتىراسىزدار، سول ءۇشىن سىزدەرگە العىسىمدى بىلدىرەمىن. سىزدەرگە مىقتى دەنساۋلىق تىلەيمىن، 100 جاسپەن شەكتەلمەي ودان دا ۇزاق عۇمىر كەشىڭىزدەر، – دەدى ا. باتالوۆ.
ءوز كەزەگىندە ارداگەرلەر – ەڭبەكشىقازاق اۋدانىنان سولتانباي جارىقباسوۆ، سارقان اۋدانىنان بەرلىبەك ىسقاقوۆ، تىل ەڭبەككەرى، بالقاش اۋدانىنان بەيسەنبەك توستىكبايەۆ ءسوز الىپ، قاتارلاستارىنا ىزگى تىلەكتەرىن جەتكىزسە، سوعىس ارداگەرى سارسەنباي قاڭتارباي اقساقال كوپشىلىككە باتا بەردى.
مەرەكەلىك شارا كونسەرتتىك باعدارالامامەن جالعاستى.
جالپى بۇگىندە جەتىسۋ جەرىندە 138 ۇلى وتان سوعىسىنىڭ ارداگەرى، 12 مىڭعا جۋىق تىل ەڭبەككەرى بار.9 مامىر – جەڭىس كۇنىنە وبلىستىق بيۋدجەتتەن ءاربىر سوعىس ارداگەرىنە 150 مىڭ تەڭگە كولەمىندە ءبىرجولعى ماتەريالدىق كومەك بەرىلدى.ارداگەرلەرگە جانە باسقا دا ساناتتاعى ازاماتتارعا شيپاجايلارعا تەگىن ەمدەلۋگە بيىلعى جىلى 187،5 ملن. تەڭگە قارجى ءبولىندى.ۇلى وتان سوعىسىنىڭ قاتىسۋشىلارى مەن مۇگەدەكتەرىن قوسالقى جانە كومەكشى قۇرالدارمەن قامتۋ ءۇشىن بيۋدجەتتەن 2 ملرد. 830 ملن. تەڭگە، ال كوممۋنالدىق قىزمەتتەرگە 16 ملن. تەڭگە قارجى قاراستىرىلعان.
الماتى وبلىسى اكىمىنىڭ باسپا ءسوز قىزمەتى
