قازاقستان ۇكىمەتى تاۋار باعاسىن قىمباتتاتپاۋ ءۇشىن 100 ميلليارد تەڭگەگە جۋىق قارجى بولگەن. باسىلىم مالىمەتىنە قاراعاندا، بۇل سومانىڭ 81 ميلليارد تەڭگەسى ساۋدا جەلىلەرىنە جەڭىلدەتىلگەن كرەديت بەرۋگە جۇمسالعان. 16،8 ميلليارد تەڭگە — تۇراقتاندىرۋ قورىنا ارنالعان.

"اسەرى بولمادى جوق — باعا ءوستى. ودان قايتا بۇل اقشانى تىكەلەي حالىققا تاراتىپ بەرۋ كەرەك ەدى، ساۋدا جەلىلەرىنە ەمەس. بىزدە 1 ميلليونعا جۋىق كەدەي بار. بارىنەن كوپ مۇقتاج بولىپ وتىرعاندار سولار.

ەگەر باعانى توقتاتا الماساڭىزدار، حالىقتىڭ وزىنە تىكەلەي قولداۋ كورسەتىڭىزدەر، الەۋمەتتىك تۇرعىدان ناشار قورعالعاندارعا سۋبسيديا بەرىڭىزدەر. ساۋدا جەلىلەرىنە تاراتقانشا، سولارعا بەرسەڭىزدەر پايداسى كوبىرەك بولارىنا سەنىمدىمىن"، — دەيدى جامالوۆ.

كەيىنگى جىلدارى قازاقستان بيلىگى ينفلياسيا ەكپىنىن توقتاتۋعا تىرىسىپ كەلەدى.

بيىل ساۋىردە ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ ۇلتتىق ستاتيستيكا بيۋروسى 2021 جىلدىڭ ناۋرىز ايىنان بەرى ازىق-تۇلىك تاۋارلارى 15 پايىزعا قىمباتتاعانىن حابارلاعان.

وتكەن اپتادا قازاقستان پرەمەر-مينيسترى ءاليحان سمايلوۆ، مامىر ايىنىڭ قورىتىندىسى قازاقستانداعى ينفلياسيانىڭ جىلدىق ەكپىنى 14 پايىزعا، ازىق-تۇلىك ينفلياسياسىنىڭ دەڭگەيى 19 پايىزعا جەتكەنىن حابارلاعان. ۇلتتىق بانك بولجامىنا قاراعاندا، قازاقستاندا 2022 جىلدىڭ سوڭىنا قاراي ينفلياسيا دەڭگەيى 13-15 پايىز بولۋعا ءتيىس.

https://dalanews.kz/del-qazir/78610-akimder-reytingi-bir-gramota-tapsyry