مەملەكەت باسشىسى ۇكىمەتتى جاڭارتۋ بويىنشا ءبىر توقتامعا كەلدى. رەفورمالاردى باتىل جۇزەگە اسىرۋ ءۇشىن وزىنە جاۋاپكەرشىلىك الاتىن، سىننان قورىقپايتىن، حالىققا، قوعامعا ۇنامايتىن شەشىمدەردى جۇزەگە اسىرا الاتىن ادام كەرەك ەكەنى ناقتىلاندى، دەپ حابارلايدى Dalanews.kz DALA INSIDE ارناسىنا سىلتەپ.

ال قازاقتىڭ ءاليحانى وسى تالاپتارعا ساي ما؟ ارنا مالىمەتىنشە، قازىرگى ۇكىمەت باسشىسى ءاليحان سمايىلوۆ قازاقستاندى قيىن ۋاقىتتان امان الىپ شىقتى. ول انتيكريزيستىك مەنەدجەر رەتىندە فۋنكسياسىن جاقسى اتقاردى.

"الايدا، سمايىلوۆ دامۋ مەنەدجەرى ەمەس دەيدى، ساراپشىلار. ول كريزيستەن الىپ شىعا الادى. ءبىراق ەلدى ارى قاراي دامۋ جولىنا ءتۇسىرۋ ءۇشىن باسقاشا ويلايتىن جاڭا پرەمەر كەرەك.

قازاقتىڭ ءاليحانى وزىنە تيەسىلى ساقتىقپەن بولاشاعىن جوسپارلاپ، ويلاپ قويدى. ول پرەمەر كەزىندە قاتتى ارتىن جىرتپادى. ديپلوماتيامەن، ەشكىممەن ۇرسىسپاي جۇمىس ىستەدى. سەبەبى، پرەمەرلىك ماڭگى ەمەس. بۇگىن رەنجىتكەن ادامى ەرتەڭ الدىنان شىعاتىنىن ءبىلدى. قازاقتىڭ ءاليحانى وسى جاعىنان العاندا ەلدىڭ ەمەس، ءوز بولاشاعىن كوبىرەك ويلاعانى راس" - دەيدى Dala Inside دەرەككوزى.

نە بولسا دا، جاڭا پرەمەرگە قازاقستان دامۋى ءۇشىن ءوز مانسابىن كونعا تىگىپ، بارىمەن جۇلىسىپ، ۇنامايتىن شەشىمدەر قابىلداپ، "جەكسۇرىن" بولۋدان باسقا امال قالماي وتىر. ايتپەسە، قازاقستاننىڭ دامۋى قيىن.

توقايەۆ شىن رەفورماتور-پرەمەر تابا الا ما؟ العاشقى سيگنالدى وسى سارسەنبى ەستيمىز. سول كەزدە ۇكىمەتتىڭ كەڭەيتىلگەن وتىرىسى وتەدى.