ناقىتاراق ايتساق، بۇگىن ۇكىمەت «ق ر ۇكىمەتى مەن بىرىككەن اراب امىرلىكتەرى ۇكىمەتىنىڭ باسىم سالالارداعى جوبالاردى دامىتۋ ءۇشىن ۇزاق مەرزىمدى ستراتەگيالىق ارىپتەستىك قۇرۋ تۋرالى بىرلەسكەن دەكلاراسياسىن راتيفيكاسيالاۋ تۋرالى» زاڭ جوباسىن پارلامەنت ماجىلىسىنەن كەرى قايتارىپ العان.
10 قاڭتاردا پرەمەر-مينيستردىڭ مىندەتىن اتقارۋشى بولعان ءاليحان سمايىلوۆ قول قويعان ۇكىمەتتىڭ ءتيىستى قاۋلىسى نورماتيۆتىك قۇقىقتىق اكتىلەردىڭ اقپاراتتىق-قۇقىقتىق جۇيەسىندە جاريالاندى.
وسى كەلىسىم تارماقتارىنىڭ بىرىندە بىلاي دەلىنگەن: «تاراپتار قازاقستان رەسپۋبليكاسىنىڭ ۇكىمەتى "اەس ءشۇلبى گەس" ج ش س (بۇدان ءارى – شگەس) جانە "اەس وسكەمەن گەس" ج ش س جارعىلىق كاپيتالىنداعى مەملەكەتتىك قاتىسۋ ۇلەسىنىڭ 100 (ءجۇز) پايىزىنا دەيىن ابۋ-دابي ينۆەستورلارى مەن قازاقستاندىق ينۆەستورلار كونسورسيۋمىنا تىكەلەي اتاۋلى ساتۋدى جۇزەگە اسىرۋعا نيەتتى ەكەنىن مويىندايدى.
بۇرىنعى پرەمەر-مينيستر اسقار مامين وتكەن جىلدىڭ قازان ايىندا باا-گە ىس-ساپارمەن باردى. سول كەزدە وسى كەلىسىمگە قول قويىلعان.
"تاراپتار ەكى تاراپتىڭ كەلىسىمى بويىنشا قازاقستان رەسپۋبليكاسىندا ەلەكتر ەنەرگەتيكاسى، فارماسيەۆتيكا، اگروونەركاسىپتىك كەشەن، كولىك جانە لوگيستيكا سالالارىنداعى جانە وزگە دە سالالارداعى جوبالاردى (بۇدان ءارى – ستراتەگيالىق ينۆەستيسيالىق جوبالار) ىسكە اسىرۋعا نيەتتى"، – دەلىنگەن كەلىسىم ماتىنىندە.
بۇعان دەيىن بۇرىنعى ەنەرگەتيكا ءمينيسترى ماعزۇم مىرزاعالييەۆ قازاقستان ءباا ينۆەستورلارىنا ءشۇلبى جانە وسكەمەن گەس اكسيالارىنىڭ 74،99%-ىن ساتۋدى جوسپارلاپ وتىرعانىن حابارلاعان بولاتىن.
ءشۇلبى گەس-ىنىڭ بەلگىلەنگەن قۋاتى – 702 مۆت، وسكەمەن گەس-ىنىڭ قۋاتى – 367،8 مۆت. ەكى ستانسيا دا ەرتىس گەس كاسكادىنىڭ قۇرامىنا كىرەدى. ءشۇلبى قۋاتى بويىنشا قازاقستانداعى ەڭ ءىرى گەس ەكەنىن ايتا كەتەيىك.
