Naqytaraq aitsaq, búgin Úkimet «QR Úkimeti men Birikken Arab Ámirlikteri úkimetiniń basym salalardaǵy jobalardy damytý úshin uzaq merzimdi strategiialyq áriptestik qurý týraly birlesken deklaratsiiasyn ratifikatsiialaý týraly» zań jobasyn Parlament Májilisinen keri qaitaryp alǵan.
10 qańtarda Premer-ministrdiń mindetin atqarýshy bolǵan Álihan Smaiylov qol qoiǵan Úkimettiń tiisti qaýlysy Normativtik quqyqtyq aktilerdiń aqparattyq-quqyqtyq júiesinde jariialandy.
Osy Kelisim tarmaqtarynyń birinde bylai delingen: «Taraptar Qazaqstan Respýblikasynyń Úkimeti "AES Shúlbi GES" JShS (budan ári – ShGES) jáne "AES Óskemen GES" JShS jarǵylyq kapitalyndaǵy memlekettik qatysý úlesiniń 100 (júz) paiyzyna deiin Abý-Dabi investorlary men qazaqstandyq investorlar konsortsiýmyna tikelei ataýly satýdy júzege asyrýǵa nietti ekenin moiyndaidy.
Burynǵy premer-ministr Asqar Mamin ótken jyldyń qazan aiynda BAÁ-ge is-saparmen bardy. Sol kezde osy Kelisimge qol qoiylǵan.
"Taraptar eki taraptyń kelisimi boiynsha Qazaqstan Respýblikasynda elektr energetikasy, farmatsevtika, agroónerkásiptik keshen, kólik jáne logistika salalaryndaǵy jáne ózge de salalardaǵy jobalardy (budan ári – strategiialyq investitsiialyq jobalar) iske asyrýǵa nietti", – delingen kelisim mátininde.
Buǵan deiin burynǵy energetika ministri Maǵzum Myrzaǵaliev Qazaqstan BAÁ investorlaryna Shúlbi jáne Óskemen GES aktsiialarynyń 74,99%-yn satýdy josparlap otyrǵanyn habarlaǵan bolatyn.
Shúlbi GES-iniń belgilengen qýaty – 702 MVt, Óskemen GES-iniń qýaty – 367,8 MVt. Eki stantsiia da Ertis GES kaskadynyń quramyna kiredi. Shúlbi qýaty boiynsha Qazaqstandaǵy eń iri GES ekenin aita keteiik.
