بۇگىن مەملەكەت باسشىسى قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى. جيىندا مەملەكەت باسشىسى پاندەميا كەزىندە ەلىمىزدىڭ دەنساۋلىق ساقتاۋ مينيسترلىگىنە ايرىقشا ستاتۋس پەن وكىلەتتىلىك بەرىلەتىنىن اتاپ ءوتتى.

 

ءبارى دەنساۋلىق ساقتاۋ ءمينيستىرىن تىڭداۋى كەرەك!

– پاندەميا كەزىندە ق ر دەنساۋلىق ساقتاۋ مينيسترىنە ايرىقشا ستاتۋس پەن وكىلەتتىلىك بەرىلەدى. ۇكىمەت مۇشەلەرى پەن اكىمدەر پاندەمياعا قارسى اتقارىپ جاتقان جۇمىستارى جايىندا مينيسترلىككە كۇندەلىكتى ەسەپ بەرۋى ءتيىس. قازىرگىدەي توتەنشە جاعداي كەزىندە بىزدەر پاندەمياعا قارسى ءىس-شارالارعا قارسى شۇعىل تۇردە شەشىم قابىلداۋىمىز كەرەك.

سول سەبەپتى دەنساۋلىق ساقتاۋ ءمينيسترىنىڭ تاپسىرماسى ۇكىمەت مۇشەلەرى مەن اكىمدەر ءۇشىن ەڭ ماڭىزدى تاپسىراماۋ بولۋى ءتيىس، – دەدى مەملەكەت باسشىسى قاسىم-جومارت توقايەۆ.

ىندەت ۋشىعىپ تۇرعاندا بارلىق قۇرىلىمداردىڭ دەنساۋلىق ساقتاۋ مينيسترلىگىنىڭ تاپسىرمالارىن دەر كەزىندە ورىنداپ، ۆيرۋسقا قارسى ءتيىمدى جۇمىس ىستەۋى ماڭىزدى.

 

«سك فارماسيا» جانە قاعازباستىلىق

بۇگىندە ق ر دەنساۋلىق ساقتاۋ مينيسترلىگى دارىگەرلەر مەن اۋرۋحانالارعا عانا جاۋاپتى مەكەمە سياقتى كورىنەدى. شىندىعىندا مينيسترلىكتىڭ جۇمىسى سان-سانالى ەكەنىن بىلەمىز.

ايتالىق، دارى-دارمەك پەن قاجەتتى مەديسينالىق تەحنيكالاردى ساتىپ الۋ ىسىمەن «سك فارماسيا» كومپانياسى اينالىسسا، ەلىمىز بويىنشا جاڭادان ەنىگزىلگەن مەديسينالىق ساقتاندىرۋ ءىسىن «الەۋمەتتىك مەديسينالىق ساقتاندىرۋ قورى» جۇزەگە اسىرادى. وسىلايشا ەلىمىزدەگى دەنساۋلىق ساقتاۋ سالاسىنىڭ نەگىزگى قارجى كوزدەرىنە وسى ەكى قارجىلىق قۇرىلىم يەلىك ەتىپ وتىر. بۇل قۇرىلىمدار ق ر دەنساۋلىق ساقتاۋ مينيسترلىگىنە تولىقتاي باعىندى دەپ ايتۋدىڭ ءوزى قيىن.

كۇنى كەشە عانا اقپارات قۇرالدارىندا ىندەتكە قارسى كاتاردان مامىر ايىنىڭ اياعىندا كەلگەن مەديسينالىق كومەكتى «سك فارماسيا» كومپانياسى قويمادا سارىمايداي ساقتاعانىن بىلگەندە جۇرت جاعاسىن ۇستادى. كومپانيا باسشىلارى قاجەتتى مەديسينالىق سەرتيفيكاتتاردى تالاپ ەتىپ، قاعازباستىلىققا بوي الدىرىپ، وزگە ەلدەن كەلگەن كومەكتى ەمحانالارعا جەتكىزبەگەنىن قالاي تۇسىنۋگە بولادى؟

ءدال سول كەزدە ەلىمىزدەگى ەمدەۋ نىسانداردا مەديسينالىق قاۋىپسىزدىك زاتتارى جەتىسپەي تالاي دارىگەر ۆيرۋس جۇقتىرعانىن بىلەمىز.

 

ايەلدىڭ اڭگىمەسى – داۋعا تامىزىق بولدى  

كۇنى كەشە عانا الەۋمەتتىك مەديسينالىق ساقتاندىرۋ قورىنىڭ باسشىسى ايباتىر جۇماعۇلوۆ بلوگەر-جۋرناليست گۇلبانۋ ابەنوۆامەن داۋلاسىپ، جۇرتتىڭ الدىندا سىنعا قالعانىن جۇرت جاقسى بىلەدى.

جۇماعۇلوۆتىڭ جۇبايى وسىدان بىرنەشە جىل بۇرىن قۇداي قوسقان قوساعى 12 كولىك سىيلاعانىن ايتىپ، الەۋمەتتىك جەلىدە ايداي الەمگە جار سالىپ جازىپتى. وسىلايشا ەركە كەلىنشەكتىڭ بىرنەشە جىل بۇرىن جازعان جازباسى جۇماعۇلوۆتى جۇرتتىڭ سىنىنا قالدىردى.

ارتىنشا جۇماعۇلوۆتىڭ جۇبايى الەۋمەتتىك جەلىدەگى پاراقشاسىن ءوشىرىپ، جۇرتتىڭ كوكەيىندەگى كۇمان-كۇدىكتى ودان سايىن زورايتىپ، وتقا ماي قۇيعانداي بولدى. ايباتىر جۇماعۇلوۆ وزدەرىندە ءبىر عانا كولىك ەكەنىن ايتقانمەن جۇرت قور باسشىسىنىڭ سوزىنە يلانعان جوق.

 

وليگارحاتاردىڭ قىزمەتشىسىن بىلىكتى بيزنەسمەندەرمەن شاتاستىرمايىق

قالاي دەسەكتە وسى ەكى قۇرىلىم ەلجان ءبىرتانوۆتىڭ تۇبىنە جەتكەنى انىق. بىزدىڭشە، وسى ەكى قۇرىلىمدى تارقاتىپ ق ر دەنساۋلىق ساقتاۋ مينيسترلىگىنىڭ قۇرامىنداعى ۆەدموستۆالىق قۇرىلىمعا اينالدىرۋ كەرەك. سول كەزدە دەنساۋلىق ساقتاۋ ءمينيسترى حالىقتىڭ الدىنداعى مورالدىق جاۋاپكەرشىلىكتى مويىنمەن كوتەرەتىن بولادى.

مەديسينا سالاسىنا باعىتتالعان قارجىنى قالاي جۇمساۋدى تازا مەديك ماماندارعا تاپسىرۋ كەرەك. سالا ماماندارى مەملەكەت قارجىسىن جۇمساي المايدى دەگەن سىڭارجاق پىكىردى قويۋ كەرەك.

ءار سالاداعى قارجىلىق قۇرىلىمدارعا بيزنەستە تابىستى جۇمىس ىستەگەن «جىگىتتەردى» تارتا بەرۋ جاقسىلىققا باستمايتىنىن كوردىك.

دەنساۋلىق ساقتاۋ ءمينيسترى الەكسەي سوي مەديسينا سالاسىنان بولەك قارجى، اكىمشىلىك باسقارۋ سالاسىندا بىلىكتى مامان ەكەنىن بىلەمىز. سوندىقتان ۆەدموسۆالىق ۇيىمدارعا قاراستى قورلار مەن اكسيونەرلىك قوعامدارعا جەكەلگەن وليگارحتاردىڭ بانكتەرى مەن كومپانيالارىندا ديرەكتور، باسقارما ءتوراعاسى بولىپ تابىستى جۇمىس ىستەگەن «ىسكەر بيزنەسمەندەردى» تىقپالاي بەرۋدىڭ قاجەتى جوق.

قازىرگى قور ءتوراعالارى وليگارحتاردىڭ بانكتەرىمەن كومپانيالارىندا جۇمىس ىستەگەن جىلدارىن بيزنەس سالاسىندا تابىستى جۇمىس ىستەگەن كەزەڭ دەپ اڭگىمە ايتىپ، دۇنيە-مۇلكىن، قىمبات ماشينالارىن سول كەزدە ساتىپ العانىن ايتۋعا ادەتتەنىپ العانىن كورىپ ءجۇرمىز.

ءاپايتوس وليگارحتارعا قىزمەت ەتكەن بىلىكتى مەنەدجەرلەردى ۆەدموستۆالىق قورلار مەن كومپانيالارعا جولاتپاۋ كەرەك. مەديسينا، ءبىلىم، قۇرىلىس سالاسىندا جۇمىس ىستەپ جۇرگەن ماماندار دا اقشانى قايدا جۇمساۋ كەرەك ەكەنىن بىلەدى.

بىزدىڭشە، الداعى ۋاقىتتا «سك فارماسيا» كومپانياسى مەن الەۋمەتتىك مەديسينالىق ساقتاندىرۋ قورى دەنساۋلىق ساقتاۋ ءمينيسترى الەكسەي سويعا باعىنۋى ءتيىس. ولاي ەتپەگەن جاعدايدا كوروناۆيرۋسقا قاراسى كۇرەسىمىز ناتيجەلى بولماۋى مۇمكىن.

ن اۋباكىر