تامىزدىڭ ءتورتى كۇنى ءبىز، قازۇۋ ستۋدەنتتەرى، اسپان استى ەلىنىڭ استاناسى بەيجيڭگە ۇشىپ كەلىپ، اۋەجايدىڭ تابالدىرىعىنان اتتاپ ۇلگەرمەي، پەكين ءتىل جانە مادەنيەت (BLCU) ۋنيۆەرسيتەتى تاراپىنان جىلى قارسى الىندىق. سول كۇنى-اق، ولار ءبىزدى ۇلى جۇڭگو قورعانىن كورۋگە اپاردى. بۇگىنگى كۇنگە دەيىن جاقسى ساقتالعان الەم كەرەمەتتەرىنىڭ ىشىنە كىرەتىن تاريحي مۇرانى سوڭىنا دەيىن ءوز كوزىممەن كورىپ وتىرعانىما سەنبەدىم. كەلەسى كۇندەر دە ماعان ءدال وسىنداي ءتاتتى ءتۇس ءتارىزدى سەزىلدى. تەك كىتاپتاردان كورۋگە بولعان جۇماق تارىزدەس يمپەراتوردىڭ جازعى سارايىنا (颐和园)، كوركەمفيلمدەردەن عانا تاماشالاي الاتىن تىيىم سالىنعان قالا (故宫)، ماوزى دوڭ قحر تۋىن جەلبىرەتكەن تياننانمىن الاڭى سەكىلدى تاريحي ماڭىزدى، كورىكتى جەرلەرگە دە باردىق. بەيجيڭدە سونىمەن قوسا بىزگە جۇڭگو ءتىلى، كالليگرافيانى ۇيرەنۋ ساباقتارى، جۇڭگو تاريحى مەن مادەنيەتى، فيلوسوفياسى دارىستەرى وتكىزىلدى. وقىتۋشىلاردىڭ بىزگە دەگەن جىلى پەيىلدەرى تاڭعالارلىق بولدى. وسىلايشا بەيجيڭدە وتكىزگەن ءاربىر ۋاقىتىم كەرەمەت ءوتتى. سودان سوڭ قىتايدىڭ مودەرن قالاسى شانحايعا بەت الدىق. مۇندا ءبىز حۋانپۋ وزەنىن كەمەمەن كەزىپ، تۇنگى شانحاي كورىنىسىنە ءتانتى بولدىق، شانحايدىڭ بيىك تەلەمۇناراسىنا كىرىپ كوردىك، جانە دە سونىڭ ىشىندەگى بالاۋىز فيگۋرالار مۇراجايىنا باردىق، سوسىن پۋدۋن كۆارتالىندا دا سەرۋەندەدەپ ۇلگەردىك. الايدا ءبىز ءزاۋلىم عيماراتقا، وسى زامانعا ساي سالىنعان كورىكتى جەرلەرگە لىق تولى الىپ شاھاردى كورىپ قانا قويماي، سونىمەن قوسا تاريحي قۇندى ورىندارعا دا باردىق. ماسەلەن، ەجەلگى قالاشىق 朱家角، شانحاي قالالىق مۇراجايى ت.ب. ال ءۇشىنشى ايالداما – چيڭداودا مەنىڭ بالا كەزىمنەن بەرگى ارمانىم ورىندالدى: مەن العاش رەت تەڭىزدى كوردىم. بۇل اسەرلى ءساتتى مەن ەشقاشان ۇمىتپاسپىن.
وسىنداي قىزىققا تولى كەزدەردى باستان كەشىرگەنىمە ۇلكەن جاعداي جاساعان قازۇۋ-عا العىس ايتۋعا ەشبىر شارشاماسپىن.
قازۇۋ، شىعىستانۋ فاكۋلتەتىنىڭ 3 كۋرس ستۋدەنتى: يليپ ايدانا
قازۇۋ، شىعىستانۋ فاكۋلتەتىنىڭ وقىتۋشىسى: شارىپقازى ءنۇرتالىپ
