تيىسىنشە، بۇنداي اۋىلدان بەرەكەنىڭ تارقامايتىنى دا بەلگىلى. مىنە، وسىنداي ازاماتتاردىڭ بىرەگەيى رەتىندە شۋ اۋدانىنىڭ قۇرمەتتى ازاماتى بولات ساۋرانبايەۆتى اتاپ وتۋگە بولادى. ول شالعاي وڭىرلەردە جاۋاپتى قىزمەتتەردى اتقارا ءجۇرىپ، ءوزى تۋىپ-وسكەن بەلباسار اۋىلىنىڭ الەۋمەتتىك وركەندەۋىنە ولشەۋسىز ۇلەس قوسىپ كەلەدى. بولات وسپان ۇلىنىڭ قاجەتتى جەردە اۋىلداستارىنىڭ يگىلىگى ءۇشىن جاسالاتىن كەز كەلگەن ورتاق ىسكە دەمەۋشىلىك تانىتۋدان دا تارتىنىپ قالعان تۇسى جوق. ماڭداي تەرىمەن تاپقان اقشاسىن يماندىلىق ورداسىنىڭ بوي تۇزەۋىنە جۇمساپ، الاقانداي اۋىلعا ءزاۋلىم مەشىت سالىپ بەرگەن بولات ساۋرانبايەۆقا اۋىلداستارىنىڭ العىستان باسقا ايتارى جوق. ودان قالا بەردى اۋىلداعى ابدەن توزىعى جەتكەن فۋتبول الاڭشاسىن تولىعىمەن سۇرگىزىپ، كولەمى 50-100 مەتردى قۇرايتىن، سوڭعى ۇلگىدەگى جاساندى جابىنى بار ۇلكەن ستاديون سالىپ، ونى اۋىل مەكتەبىنىڭ مەنشىگىنە وتكىزدى. قازىرگى تاڭدا مۇندا فۋتبول ۇيىرمەسى اشىلىپ، ارنايى باپكەر دە بولىنگەن.
وتكەن جىلى اۋدان تۇرعىندارى تاعى دا ءبىر تاريحي ءساتتىڭ كۋاسى بولدى. بىلتىر بولات ساۋرانبايەۆتىڭ مۇرىندىق بولۋىمەن بوي كوتەرگەلى جاتقان «بەلباسار» مادەني-سپورتتىق كەشەنىنىڭ قازىعى قاعىلىپ، العاشقى تاسى قالاندى. سونىمەن قاتار، تۇرعىندارعا سپورت كەشەنىنىڭ جوباسى تانىسىتىرىلدى. ەكى قاباتتان تۇراتىن نىساننىڭ جالپى كولەمى 2696 شارشى مەتردى قۇرايدى ەكەن. كەشەننىڭ تومەنگى قاباتىندا ورنالاساتىن امبەباپ سپورت زالدا كەلۋشىلەرگە كىشى فۋتبول، ۆوللەيبول جانە باسكەتبول ويىندارىن ويناۋعا مۇمكىندىك بار. ال ەكىنشى قاباتتا بوكس، كۇرەس جانە اۋىر اتلەتيكا زالدارى بولادى دەپ كۇتىلۋدە. مۇنداعى قۇرىلىس جۇمىستارىن ەلىمىزگە بەلگىلى «SHEBERBUILD» قۇرىلىس كومپانياسى جۇرگىزەتىن بولادى. الداعى ەكى جىل بويى 50-گە جۋىق ادام جۇمىسپەن قامتىلماق. مىنە، ءدال قازىرگىدەي ساعات تۇرماق سەكۋندتىڭ ءوزى ەسەپتەۋلى شاقتا قانشاما جاننىڭ ءناپاقاسىن تاۋىپ بەرۋ كەز كەلگەننىڭ قولىنان كەلە بەرمەيتىن ەرلىك دەسەك اسىرەلەگەنىمىز ەمەس. بولات ساۋرانبايەۆتىڭ ايتۋىنشا، «بەلباسار» سپورت كەشەنىنىڭ اكىمشىلىك بولمەسى مەن سپورتشىلاردىڭ كيىم اۋىستىراتىن جانە جۋىناتىن بولمەلەرىنىڭ بارلىعى دا حالىقارالىق ستاندارتقا ساي بولماق.
– قۇرىلىسى وتكەن جىلى باستالعان ۇلكەن نىسانعا قوماقتى قارجى جۇمساۋدامىز. سوعان بايلانىستى، «حاتي ساۋرانبايەۆ» اتىنداعى قوردى قۇردىق. الداعى ۋاقىتتا كەز كەلگەن ازامات ءوز شاما-شارقىنشا قۇرىلعان قورعا قارجى سالا الادى.وسى تۇستا، نىساننىڭ قۇرىلىسى تولىعىمەن اياقتالعان كەزدە ەلىمىزگە بەلگىلى ءبىرقاتار ازاماتتار قولداۋ بىلدىرەتىندىكتەرىن ايتا كەتكەن ءجون. ماسەلەن، ەلىمىزدىڭ داڭقتى بوكسشىسى سەرىك قوناقبايەۆ كەشەننىڭ اشىلۋ سالتاناتىندا حالىقارالىق ستاندارتقا ساي رينگتى بارلىق قۇرال-جابدىعىمەن بىرگە سىيعا تارتاتىنىن جەتكىزسە، بوكستان سيدنەي وليمپياداسىنىڭ جەڭىمپازى ەرماحان يبرايموۆ الداعى ۋاقىتتا وسى كەشەننەن وليمپياداعا دايارلاۋ ورتالىعىنىڭ فيليالىن اشۋدى جوسپارلاپ وتىر. سونداي-اق، «قايرات» فۋتزال كلۋبىنىڭ پرەزيدەنتى قايرات ورازبەكوۆ شاعىن فۋتبول الاڭشاسىن جابدىقتاۋدى تولىعىمەن ءوز موينىنا الاتىنىن جەتكىزدى، - دەيدى بولات وسپان ۇلى.
ايتا كەتۋىمىز كەرەك، قۇرىلىسى بىلتىر باستالعان سپورت كەشەنى ۇستىمىزدەگى جىلى پايدالانۋعا بەرىلىپ، اۋدان مەن اۋىل تۇرعىندارىنا قولجەتىمدى بولماق.
