Shýda úlken sport kesheni boi kóterýde
Tiisinshe, bundai aýyldan berekeniń tarqamaityny da belgili. Mine, osyndai azamattardyń biregeii retinde Shý aýdanynyń Qurmetti azamaty Bolat Saýranbaevty atap ótýge bolady. Ol shalǵai óńirlerde jaýapty qyzmetterdi atqara júrip, ózi týyp-ósken Belbasar aýylynyń áleýmettik órkendeýine ólsheýsiz úles qosyp keledi. Bolat Ospanulynyń qajetti jerde aýyldastarynyń igiligi úshin jasalatyn kez kelgen ortaq iske demeýshilik tanytýdan da tartynyp qalǵan tusy joq. Mańdai terimen tapqan aqshasyn imandylyq ordasynyń boi túzeýine jumsap, alaqandai aýylǵa záýlim meshit salyp bergen Bolat Saýranbaevqa aýyldastarynyń alǵystan basqa aitary joq. Odan qala berdi aýyldaǵy ábden tozyǵy jetken fýtbol alańshasyn tolyǵymen súrgizip, kólemi 50-100 metrdi quraityn, sońǵy úlgidegi jasandy jabyny bar úlken stadion salyp, ony aýyl mektebiniń menshigine ótkizdi. Qazirgi tańda munda fýtbol úiirmesi ashylyp, arnaiy bapker de bólingen.
Ótken jyly aýdan turǵyndary taǵy da bir tarihi sáttiń kýási boldy. Byltyr Bolat Saýranbaevtyń muryndyq bolýymen boi kótergeli jatqan «Belbasar» mádeni-sporttyq kesheniniń qazyǵy qaǵylyp, alǵashqy tasy qalandy. Sonymen qatar, turǵyndarǵa sport kesheniniń jobasy tanysytyryldy. Eki qabattan turatyn nysannyń jalpy kólemi 2696 sharshy metrdi quraidy eken. Keshenniń tómengi qabatynda ornalasatyn ámbebap sport zalda kelýshilerge kishi fýtbol, volleibol jáne basketbol oiyndaryn oinaýǵa múmkindik bar. Al ekinshi qabatta boks, kúres jáne aýyr atletika zaldary bolady dep kútilýde. Mundaǵy qurylys jumystaryn elimizge belgili «SHEBERBUILD» qurylys kompaniiasy júrgizetin bolady. Aldaǵy eki jyl boiy 50-ge jýyq adam jumyspen qamtylmaq. Mine, dál qazirgidei saǵat turmaq sekýndtyń ózi esepteýli shaqta qanshama jannyń nápaqasyn taýyp berý kez kelgenniń qolynan kele bermeitin erlik desek ásirelegenimiz emes. Bolat Saýranbaevtyń aitýynsha, «Belbasar» sport kesheniniń ákimshilik bólmesi men sportshylardyń kiim aýystyratyn jáne jýynatyn bólmeleriniń barlyǵy da halyqaralyq standartqa sai bolmaq.
– Qurylysy ótken jyly bastalǵan úlken nysanǵa qomaqty qarjy jumsaýdamyz. Soǵan bailanysty, «Hati Saýranbaev» atyndaǵy qordy qurdyq. Aldaǵy ýaqytta kez kelgen azamat óz shama-sharqynsha qurylǵan qorǵa qarjy sala alady.Osy tusta, nysannyń qurylysy tolyǵymen aiaqtalǵan kezde elimizge belgili birqatar azamattar qoldaý bildiretindikterin aita ketken jón. Máselen, elimizdiń dańqty boksshysy Serik Qonaqbaev keshenniń ashylý saltanatynda halyqaralyq standartqa sai ringti barlyq qural-jabdyǵymen birge syiǵa tartatynyn jetkizse, bokstan Sidnei Olimpiadasynyń jeńimpazy Ermahan Ibraimov aldaǵy ýaqytta osy keshennen olimpiadaǵa daiarlaý ortalyǵynyń filialyn ashýdy josparlap otyr. Sondai-aq, «Qairat» fýtzal klýbynyń prezidenti Qairat Orazbekov shaǵyn fýtbol alańshasyn jabdyqtaýdy tolyǵymen óz moinyna alatynyn jetkizdi, - deidi Bolat Ospanuly.
Aita ketýimiz kerek, qurylysy byltyr bastalǵan sport kesheni ústimizdegi jyly paidalanýǵa berilip, aýdan men aýyl turǵyndaryna qoljetimdi bolmaq.
