وتىرىستىڭ كۇن تارتىبىندە ءبىر عانا ماسەلە قارالدى. ول –ۇستىمىزدەگى جىلدىڭ 17 تامىزىندا كەڭەس وداعىنىڭ باتىرى ساتتار ەستەمەسوۆتىڭ 100 جىلدىق مەرەيتويىن اۋدان كولەمىندە اتاپ ءوتۋدى تالقىلاۋ. اۋقىمدى تۇردە وتكىزىلگەلى جاتقان مەرەيتوي جوسپارىنىڭ جوباسى كەڭەس وتىرىسى بارىسىندا تالقىعا ءتۇستى. جوسپار جوباسىندا ەڭ الدىمەن تازالىق جۇمىسىنان باستاۋ قاجەتتىگى بەلگىلەنگەن. اسىرەسە، شۋ قالاسىنداعى «جەڭىس» ساياباعى، «باتىس» مولتەك اۋدانىنداعى ءسادۋ شاكىروۆتىڭ ەسكەرتكىشى جانە ونىڭ ماڭى، اۋدان ورتالىعى تولە بي اۋىلىنداعى ۇلى وتان سوعىسى، اۋعان سوعىسى قۇرباندارىنا ارنالعان ەسكەرتكىشتەر ورنالاسقان اللەيالارعا، ساتتار ەستەمەسوۆ ومىرگە كەلگەن كوكقاينار اۋىلدىق وكرۋگىنە تازالىق جۇمىستارىن ەسەلەپ جۇرگىزىپ، رەتكە كەلتىرۋ قاجەتتىگى جوسپار جوباسىنا بەلگىلەندى. سونىمەن قاتار، مەرەيتويعا وراي، كوكقاينار اۋىلىنداعى ساتتار ەستەمەسوۆ اتىنداعى ورتا مەكتەپكە اعىمداعى جوندەۋ جۇمىستارىن جۇرگىزىپ، باتىرعا ارنالعان مۋزەي جابدىقتارىن تولىقتىرۋ كەرەكتىگى ءسوز بولدى. وسى سىندى كولەمدى جۇمىستاردىڭ مەرەيتوي مەرزىمىنەدەيىن جۇزەگە اسىرىلۋىن قاداعالاۋ ءۇشىن ارنايى ۇيىمداستىرۋ كوميسسياسى قۇرىلاتىن بولدى. كوميسسيا ءتوراعاسى بولىپ اۋداندىق ءماسليحاتتىڭ حاتشىسى ەرجان كورىكباي ۇلى تاعايىندالدى.
ال، اۋدان باسشىسى قايرات اسكەربەك ۇلى كەڭەس وتىرىسى سوڭىندا مەرەيتويدى وتكىزۋدىڭ ناقتى جوسپارى بەكىتىلىپ، ۇيىمداستىرۋ جۇمىسىنا ەرتەرەك قامدانۋ قاجەتتىگىن اتاپ ءوتتى. راسىمەن دە، وبلىسىمىزدىڭ مەرەيتويىمەن قاتار كەلگەن ساتتار ەستەمەسوۆتىڭ 100 جىلدىعى ۇلكەن كولەمدە تويلانباق. اتاۋلى شاراعا اۋداننىڭ اتقامىنەرلەرى بارىنشى اتسالىسىپ، دايىندىق جۇمىستارىن وسى باستاپ پىسىقتاۋى قاجەت. ويتكەنى، كەڭەس وداعىنىڭ باتىرى، ءبىرتۋار ازامات ساتتار ەستەمەسوۆ اۋدان تۇرعىنارىنىڭ ۇلگى تۇتار ۇلكەن تۇلعالارىنىڭ ءبىرى. راس، بۇگىنگى كۇنگە دەيىن باتىر بابامىزعا ارنالعان كوپتەگەن شارالار قولعا الىندى. شۋ قالاسىنداعى «جەڭىس» ساياباعىندا ەڭسەلى ەسكەرتكىشى ورناتىلىپ، كوكقاينار اۋىلدىق وكرۋگىندەگى مەكتەپ پەن كوشەگە ساتتار ەستەمەسوۆتىڭ اتى بەرىلدى. بۇل دا شۋلىق شەندىلەردىڭ اۋىزبىرشىلىگىن بىلدىرسە كەرەك-تى.
