Shýda Sattar Estemesovtyń 100 jyldyǵy atalyp ótpek
Otyrystyń kún tártibinde bir ǵana másele qaraldy. Ol –ústimizdegi jyldyń 17 tamyzynda Keńes Odaǵynyń batyry Sattar Estemesovtyń 100 jyldyq mereitoiyn aýdan kóleminde atap ótýdi talqylaý. Aýqymdy túrde ótkizilgeli jatqan mereitoi josparynyń jobasy keńes otyrysy barysynda talqyǵa tústi. Jospar jobasynda eń aldymen tazalyq jumysynan bastaý qajettigi belgilengen. Ásirese, Shý qalasyndaǵy «Jeńis» saiabaǵy, «Batys» móltek aýdanyndaǵy Sádý Shákirovtyń eskertkishi jáne onyń mańy, aýdan ortalyǵy Tóle bi aýylyndaǵy Uly Otan soǵysy, Aýǵan soǵysy qurbandaryna arnalǵan eskertkishter ornalasqan alleialarǵa, Sattar Estemesov ómirge kelgen Kókqainar aýyldyq okrýgine tazalyq jumystaryn eselep júrgizip, retke keltirý qajettigi jospar jobasyna belgilendi. Sonymen qatar, mereitoiǵa orai, Kókqainar aýylyndaǵy Sattar Estemesov atyndaǵy orta mektepke aǵymdaǵy jóndeý jumystaryn júrgizip, batyrǵa arnalǵan mýzei jabdyqtaryn tolyqtyrý kerektigi sóz boldy. Osy syndy kólemdi jumystardyń mereitoi merziminedeiin júzege asyrylýyn qadaǵalaý úshin arnaiy uiymdastyrý komissiiasy qurylatyn boldy. Komissiia tóraǵasy bolyp aýdandyq máslihattyń hatshysy Erjan Kórikbaiuly taǵaiyndaldy.
Al, aýdan basshysy Qairat Áskerbekuly keńes otyrysy sońynda mereitoidy ótkizýdiń naqty jospary bekitilip, uiymdastyrý jumysyna erterek qamdaný qajettigin atap ótti. Rasymen de, oblysymyzdyń mereitoiymen qatar kelgen Sattar Estemesovtyń 100 jyldyǵy úlken kólemde toilanbaq. Ataýly sharaǵa aýdannyń atqaminerleri barynshy atsalysyp, daiyndyq jumystaryn osy bastap pysyqtaýy qajet. Óitkeni, Keńes Odaǵynyń batyry, birtýar azamat Sattar Estemesov aýdan turǵynarynyń úlgi tutar úlken tulǵalarynyń biri. Ras, búgingi kúnge deiin batyr babamyzǵa arnalǵan kóptegen sharalar qolǵa alyndy. Shý qalasyndaǵy «Jeńis» saiabaǵynda eńseli eskertkishi ornatylyp, Kókqainar aýyldyq okrýgindegi mektep pen kóshege Sattar Estemesovtyń aty berildi. Bul da shýlyq shendilerdiń aýyzbirshiligin bildirse kerek-ti.
