شۋ اۋدانىنداعى 139 706 گەكتار جەر اۋىل شارۋاشىلىق ماقساتىنداعى ەگىستىك جەرگە تيەسىلى دەسەك، ونىڭ ىشىندەگى جەردىڭ 27 516 گەكتارى سۋارمالى، 112 190 گەكتارى ءتالىمدى ەگىستىك جەردى قامتىپ وتىر.
اۋدان اكىمدىگىنىڭ اۋىلشارۋاشىلىعى ءبولىمى بەرگەن مالىمەتكە سۇيەنسەك، بيىلعى جىلعى داقىلداردى ورنالاستىرۋ جوسپارى وتكەن جىلعى جوسپارمەن سالىستىرعاندا 1490 گەكتارعا ۇلعايتىلعان جانە 30 606 گەكتار جەرگە ءسۇر ايدالىپ، بارلىعى 138 506 گەكتار جەردى پايدالانۋ جوسپارلانىپ، ونىڭ پايدالانۋى 99،1 پايىزعا جەتكىزىلەدى دەپ بولجامدالۋدا. ياعني، ۇستىمىزدەگى جىلى وراق ورىپ، كەتپەن تۇرەتىن شۋلىق ديقانشىلار 21 640 گا جەرگە جازدىق ارپا، 1470 گا داندىك جۇگەرى، 250 گا نۋت، 9760 گا مايلى داقىلدار (ونى ىشىندە كۇنباعىس 525 گا، ماقسارى 9235 گا) 1500 گا قانت قىزىلشاسى، 1200 گا كارتوپ، 10 180 گا كوكونىس، 8520 گا باقشا، 38 610 گا مال ازىعى داقىلدارىن سەبۋدى جوسپارلاپ وتىر.
ءبولىم مالىمەتى بويىنشا، اۋىلشارۋاشىلىعى تەحنيكالارى دا 100 پايىزعا ساقاداي ساي. بيىل 17 ملن.470 مىڭ تەڭگەگە 6 دانا اۋىل شارۋاشىلىق تەحنيكاسى الىنعان. ال، جانار-جاعارمايمەن قامتاماسىز ەتۋ باعىتىندا تومەندەتىلگەن باعامەن اۋدانعا 2200 توننا ديزەل وتىنى بولىنگەن. بۇگىنگى كۇنگە «شۋ مۇناي بازاسى» جشس-نە كەلگەن 430 توننا ارزانداتىلعان جانارمايدىڭ 350 تونناسى اۋداننىڭ اگروقۇرىلىمدارىنا ءليترى 176 تەڭگەدەن بەرىلىپ، ولار دالا جۇمىستارىنا جەتكىلىكتى پايدالانۋدا. سونىمەن قاتار، بيىلعى جىلى 1 توننا اممياك سەليتراسىنىڭ باعاسى 78 400 تەڭگە، تاسىمالداۋ قۇنى ءار تونناسىنا 5 950 تەڭگەنى قۇراپ، بارلىعى 84 350 تەڭگە بولىپ وتىر. بۇگىنگى كۇنى اتالعان تىڭايتقىشقا «دۋلات جايسان» جاۋاپكەرشىلىگى شەكتەۋلى سەرىكتەستىگى 30 تونناعا، «اگرو پروفيت» جاۋاپكەرشىلىگى شەكتەۋلى سەرىكتەستىگى 20 تونناعا تاپسىرىس بەرىپتى.
دەسە دە، ەگىننىڭ شىعىمدىلىعى تەك قانا ەگىنشىنىڭ ەڭبەگىنە تاۋەلدى ەمەس ەكەنى بەلگىلى. قامبامىز التىن دانگە تولۋ ءۇشىن تابيعات-انا دا بىزگە مەيىرىمىن توگىپ، قولداۋ كورسەتۋى ءتيىس. سوندا عانا جايقالعان ەگىس دالاسىن جايپاپ كەتەتىن قۋاڭشىلىقتىڭ بەتى ءارى قاراپ، جيىن-تەرىن مول بولماق.
