ناۋرىز ايىنان باستاپ شىعىس قازاقستان وبلىسىنىڭ ءتورت اۋدانىندا جۇمىس كەستەسى وزگەردى،- دەپ حابارلايدى Dalanews.kz
ەندى تارباعاتاي، زايسان، كۇرشىم جانە سامار اۋداندارىنىڭ تۇرعىندارى جۇمىستى تاڭعى 08:00-دە باستاپ، 17:30-دا اياقتايدى. تۇسكى ءۇزىلىس 12:00-دەن 13:30-عا دەيىن بەلگىلەنگەن.
بۇل جاڭاشىلدىق ءوڭىردىڭ تابيعي ەرەكشەلىكتەرىمەن – ەرتە تاڭ اتىپ، كۇننىڭ ەرتە باتۋىمەن بايلانىستى. جاڭا كەستە تۇرعىندارعا كۇندىزگى جارىقتى ءتيىمدى پايدالانۋ مۇمكىندىگىن بەرەدى. وزگەرىستەر مەكتەپتەرگە، بالاباقشالارعا جانە مەديسينالىق مەكەمەلەرگە اسەر ەتپەيدى، سەبەبى ولار بۇعان دەيىن وسى كەستە بويىنشا جۇمىس ىستەپ كەلگەن.
زايسان اۋدانىنىڭ اكىمى اەليتا احمەتسالىم قىزى بۇل شەشىم جەرگىلىكتى تۇرعىنداردىڭ پىكىرى ەسكەرىلە وتىرىپ قابىلدانعانىن اتاپ ءوتتى.
"بۇل شەشىمدى قابىلداماس بۇرىن، ءبىز ءار اۋىلدىق وكرۋگتە جينالىستار وتكىزدىك، تۇرعىندار بۇل باستامانى قولدادى. سەبەبى، زايسان اۋدانى شىعىس قازاقستان وبلىسىنىڭ شىعىس شەكاراسىنا ەڭ جاقىن ورنالاسقان، سوندىقتان بىزدە كۇن ەرتە شىعادى، ياعني جارىق كۇن دە ەرتە باستالادى. سول سەبەپتى، جۇمىس كۇنىنىڭ 08:00-دە باستالىپ، 17:30-دا اياقتالعانى حالىق ءۇشىن الدەقايدا قولايلى – جۇمىستان كەيىن ءۇي شارۋاسىنا، بالالارعا جانە جاقىندارىنا كوبىرەك ۋاقىت قالادى"، – دەدى زايسان اۋدانىنىڭ اكىمى اەليتا احمەتسالىم قىزى.
سامار اۋدانىنىڭ ورتالىق كىتاپحانا ديرەكتورى گۋلميرا باكيرگالوۆا دا بۇل جاڭاشىلدىقتى وڭ باعالادى.
"ءبىز بۇعان دەيىن دە وسىنداي جۇمىس كەستەسىنىڭ قاجەتتىلىگى تۋرالى ايتىپ جۇرگەن ەدىك. ەندى قىس مەزگىلىندە جۇمىستى ەرتەرەك اياقتاۋعا، ال جازدا ۋاقىتتى تيىمدىرەك بولۋگە مۇمكىندىك بولادى"، – دەپ ءبولىستى كىتاپحانا ديرەكتورى.
جاڭا جۇمىس ءتارتىبىن ەنگىزبەس بۇرىن جەرگىلىكتى بيلىك وكىلدەرى تۇرعىندارمەن كەزدەسۋلەر وتكىزىپ، ولار بۇل باستامانى ءبىراۋىزدان قولدادى.
بۇعان دەيىن، جىل باسىنان بەرى، وبلىستىڭ تاعى ءۇش اۋدانىندا وسىنداي جۇمىس رەجيمى ەنگىزىلگەن بولاتىن. قاڭتار ايىندا كاتونقاراعاي اۋدانى جاڭا كەستەگە كوشسە، اقپاندا ۇلكەن نارىن جانە مارقاكول اۋداندارىندا دا وسى ءتارتىپ ورنادى.
