جۇمىسشى ماماندىقتار جىلى اياسىندا شىعىس قازاقستان وبلىسىندا ءىس-شارالار جوسپارى بەكىتىلىپ، سوعان سايكەس 2025–2026 جاڭا وقۋ جىلىندا جاڭا ماماندىقتار اشىلادى. ولاردىڭ قاتارىندا ۇشقىشسىز اۋە جۇيەلەرى، اۋە تاسىمالدارىن ۇيىمداستىرۋ، لوگيستيكا، سۋ كولىگىن پايدالانۋ جانە باسقا دا باعىتتار بار،- دەپ حابارلايدى Dalanews.kz
اتالعان ماماندىقتارعا 290 مەملەكەتتىك ءبىلىم بەرۋ تاپسىرىسى ءبولىندى.
تەحنيكالىق جانە كاسىپتىك ءبىلىم (تجكب) جۇيەسىندە قولجەتىمدىلىك پەن ساپانى قامتاماسىز ەتۋ ماقساتىندا وبلىستا 38 كوللەدج جۇمىس ىستەيدى. ولار 101 ماماندىق بويىنشا كادرلار دايارلاۋدا. قازىرگى ۋاقىتتا كوللەدجدەردە 19 مىڭنان استام ستۋدەنت وقيدى، ونىڭ ىشىندە 16 747 ستۋدەنت (83،8%) مەملەكەتتىك تاپسىرىس ەسەبىنەن ءبىلىم الۋدا.
ءوڭىر كوللەدجدەرى 900-دەن استام كاسىپورىنمەن ارىپتەستىك ورناتقان. كاسىپورىنداردىڭ سۇرانىسى بويىنشا 2575 ستۋدەنت مەملەكەتتىك تاپسىرىس اياسىندا ماقساتتى دايارلىقتان وتۋدە.
بۇگىنگى كۇنگە دەيىن ولاردىڭ 306-سى وقۋىن ءتامامدادى، 271ء-ى (88%) تۇراقتى جۇمىسپەن قامتىلدى. سونىمەن قاتار، كادر دايارلاۋ 27 كوللەدجدە 448 كاسىپورىننىڭ قاتىسۋىمەن ءدۋالدى وقىتۋ ارقىلى جۇزەگە اسىرىلىپ، 5 مىڭ ستۋدەنتتى قامتىپ وتىر.
جاڭا وقۋ جىلىندا سەگىز كوللەدجدىڭ ماتەريالدىق-تەحنيكالىق بازاسى جاڭارتىلىپ، زاماناۋي قۇرال-جابدىقتار جەتكىزىلدى. ولار: وسكەمەن قۇرىلىس-تەحنيكالىق كوللەدجى، وسكەمەن جوعارى پوليتەحنيكالىق كوللەدجى، وسكەمەن كوپسالالى تەحنولوگيالىق كوللەدجى، شق كوپسالالى كوللەدجى، تەحنولوگيا جانە سەرۆيس كوللەدجى، گلۋبوكوە اگرارلىق كوللەدجى، سامار اگرارلىق-تەحنيكالىق كوللەدجى، ۇلكەن نارىن كوللەدجى.
2025–2026 وقۋ جىلىنا ستۋدەنتتەردى تەگىن وقىتۋعا ارنالعان مەملەكەتتىك تاپسىرىس 7130 ورىندى قۇرادى، بۇل وتكەن جىلمەن سالىستىرعاندا 7%-عا ارتتى. ونىڭ ىشىندە 980 ورىن جۇمىس بەرۋشىلەردىڭ سۇرانىسى نەگىزىندە ماقساتتى دايارلىققا ءبولىندى. قۇجات قابىلداۋ 27 تامىزدا اياقتالادى.
وقۋشىلارعا كاسىبي باعدار بەرۋدى قولداۋ ماقساتىندا وبلىستا ءتۇرلى شارالار وتكىزىلۋدە.
اتاپ ايتقاندا، مەكتەپ وقۋشىلارى ماماندىقتارمەن وبلىستىق «My PRO» كاسىپتەر فەستيۆالى، «StartProfi-Shygys» ستەند-موبى، «پۋتيەۆوديتەل» باعدارلاماسى بويىنشا كۋرستار، كاسىپورىندارعا ەكسكۋرسيالار، اشىق ەسىك كۇندەرى جانە جازعى لاگەرلەر ارقىلى تانىسۋعا مۇمكىندىك الدى.
