ق ر پرەزيدەنتى قاسىم-جومارت توقايەۆتىڭ تاپسىرمالارىن جۇزەگە اسىرۋ اياسىندا ۇكىمەت رەزەرۆىنەن شىعىس قازاقستان وبلىسىنداعى جىلۋ جەلىلەرىن جوندەۋ-قالپىنا كەلتىرۋ جۇمىستارىن جۇرگىزۋگە 2،5 ملرد تەڭگەدەن استام قارجى ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى،- دەپ حابارلايدى Dalanews.kz
قۇجاتقا سايكەس قاراجات ريددەر قالاسى مەن ق. قايسەنوۆ كەنتىنىڭ جىلۋ جەلىلەرىندە جوندەۋ جۇمىستارىن اياقتاۋعا باعىتتالادى. بولىنگەن قارجىنىڭ نەگىزگى بولىگىن ريددەر قالاسىنىڭ جىلۋ جەلىلەرىنىڭ ەڭ قاتتى توزعان 5،9 كم ۋچاسكەسىن كۇردەلى جوندەۋگە جۇمساۋ جوسپارلانىپ وتىر.
ۇلان اۋدانى ق. قايسەنوۆ كەنتىندە ۇزىندىعى 9 كم جىلۋ جەلىلەرىن رەكونسترۋكسيالاۋدىڭ ەكىنشى كەزەگىن اياقتاۋعا 113 ملن تەڭگە باعىتتاۋ جوسپارلانعان.
"جالپى شىعىس قازاقستان وبلىسىنىڭ ەلدى مەكەندەرىندە جىلۋ جەلىلەرى 30 جىلدان استام ۋاقىت بويى پايدالانىلىپ كەلەدى. وسى كەزەڭدە ولارعا كۇردەلى رەكونسترۋكسيا جاسالعان جوق. توزۋ دەڭگەيى ورتا ەسەپپەن 55%-دان، ال جەكەلەگەن ەلدى مەكەندەردە 75%-دان اسادى"، - دەلىنگەن ۇكىمەت حابارلاماسىندا.
ەستەرىڭىزگە سالا كەتەيىك، وسى جىلدىڭ مامىر ايىندا ق ر ۇكىمەتىنىڭ رەزەرۆىنەن ەكى قازاندىق اگرەگاتىن جوندەۋگە، №5 رەدۋكسيالىق-سالقىنداتۋ قوندىرعىسىنىڭ تەحنولوگيالىق ۇدەرىستەرىن باسقارۋدىڭ اۆتوماتتاندىرىلعان جۇيەسىن ەنگىزۋگە، سونداي-اق ريددەر قالاسىنىڭ جەو-نىڭ ءوز قاجەتتىلىكتەرىن قامتاماسىز ەتەتىن ەلەكتروتەحنيكالىق جابدىقتىڭ ءبىر بولىگىن اۋىستىرۋعا شامامەن 1،7 ملرد تەڭگە ءبولىندى.
سوڭعى ەكى جىلدا قالادا جوندەۋ جۇمىستارى توتەنشە جاعدايدا جانە جەو-نى تەزىرەك ىسكە قوسۋ جانە جىلۋ جەلىلەرىن جوندەۋ قاجەتتىلىگىندە جۇرگىزىلدى. جەدەل ارەكەت ەتۋدىڭ ارقاسىندا ەكى جىل ىشىندە توزۋ 82%-دان 66،8%-عا دەيىن تومەندەدى.
