شىعىس قازاقستان وبلىسىندا ۇلتارالىق ارازدىقتى قوزدىردى دەگەن كۇدىكپەن بلوگەر ۇستالدى، دەپ حابارلايدى Dalanews.kz ىشكى ىستەر مينيسترلىگىنە سىلتەمە جاساپ.
ۆەدومستۆو مالىمەتىنشە، جاريالانعان ۆيدەوماتەريالدارعا پسيحولوگيالىق-فيلولوگيالىق ساراپتاما جۇرگىزىلىپ، وندا ۇلتارالىق ارازدىقتى قوزدىرۋ بەلگىلەرى بار ەكەنى راستالعان.
پوليسيانىڭ دەرەگىنە سايكەس، قۇقىق قورعاۋ ورگاندارىنا TikTok جەلىسىندەگى قولدانۋشىعا قاتىستى شاعىممەن ءوڭىر تۇرعىنى جۇگىنگەن. ول تىكەلەي ەفير بارىسىندا ۇلتتىق بەلگى بويىنشا قورلايتىن سوزدەر ايتىلعانىن كورسەتكەن.
اقپاراتتا 35 جاستاعى ەر ادامنىڭ بىرنەشە اككاۋنت ارقىلى «باتل» فورماتىندا تىكەلەي ەفيرلەر وتكىزگەنى ايتىلدى. بولجام بويىنشا، ول ماس كۇيىندە بالاعات سوزدەر ايتىپ، ار-نامىستى قورلايتىن پىكىرلەر بىلدىرگەن.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى. اتالعان دەرەك بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
