تۇرعىن ءۇي قۇرىلىسى ماسەلەسى ايماق باسشىسى دانيال احمەتوۆتىڭ توراعالىعىمەن وتكەن شىعىس قازاقستان وبلىسى اكىمدىگىنىڭ وتىرىسىندا قارالدى.
2015 جىلى قارجىلاندىرۋدىڭ بارلىق كوزدەرى ارقىلى 81 كوپقاباتتى تۇرعىن ءۇيدىڭ قۇرىلىسى جۇرگىزىلگەن. ولاردىڭ 38ء-ى وسكەمەن، سەمەي، ريددەر قالالارى مەن ۇلان، گلۋبوكوە، بورودۋليحا اۋداندارىندا پايدالانۋعا بەرىلدى.
2016 جىلى اۋىسپالى نىساندارمەن قاتار جالپى اۋدانى 538،8 مىڭ شارشى مەتردى قۇرايتىن نەمەسە 6 543 پاتەرلى 52 تۇرعىن ءۇي سالىناتىن بولادى.
سالىناتىن ۇيلەردىڭ باسىم كوپشىلىگى نەسيەلىك جانە جالدامالى ۇيلەر. وبلىس اكىمىنىڭ تاپسىرماسى بويىنشا ورتاق قارجىلاندىرۋ قاعيداتى بويىنشا جەكە قۇرىلىسشىلاردى جۇمىلدىرا وتىرىپ «ەرتىس» اكك ارقىلى 11 تۇرعىن ءۇيدىڭ قۇرىلىسى جۇرگىزىلمەك.
– تۇرعىن ۇيلەردى تىكەلەي بيۋدجەت قارجىسىنا سالۋدى توقتاتۋ كەرەك. جاقىن جىلدارى بۇل سالاعا قارجىلىق اعىلىمنىڭ ازاياتىنىن ەسكەرگەن ءجون. ميللياردتاعان قاراجاتقا بولاشاقتىڭ ينفراقۇرىلىمىن سالعانشا، قازىرگى ۋاقىتتىڭ جوبالارىن ىسكە اسىرايىق. وسكەمەن جانە سەمەي قالالارىندا ينفراقۇرىلىمدارى دايىن اۋدانداردا ۇيلەر سالۋ كەرەك، - دەدى دانيال احمەتوۆ.
ايتا كەتۋ كەرەك، 2017 جىلى جالپى اۋدانى 272 مىڭ شارشى مەتردى قۇرايتىن 31 كوپپاتەرلى تۇرعىن ءۇيدىڭ قۇرىلىسى جوسپارلانۋدا.
