شىعىس قازاقستان وبلىسىندا كوكتەمگى سۋ تاسقىنىنىڭ الدىن الۋ شارالارى جۇرگىزىلىپ جاتىر،- دەپ حابارلايدى Dalanews.kz 

ءقاۋىپتى ايماقتاردا وزەندەردەگى مۇزدى السىرەتۋ ءۇشىن جارىلىس جۇمىستارى ۇيىمداستىرىلىپ، سۋ وتكىزۋ جۇيەلەرى تازارتىلىپ جاتىر.

شەمونايحا اۋدانىنداعى ۆەرح-ۋبا اۋىلى ماڭىندا مۇزدىڭ قالىڭدىعى 60 سم-گە دەيىن جەتكەندىكتەن، ماماندار ارنايى جارىلىس جۇمىستارىن جۇرگىزدى. بۇل شارا وزەن ارناسىندا مۇز كەپتەلىستەرىن بولدىرماۋ ءۇشىن قاجەت بولدى. ناتيجەسىندە 10 692 شارشى مەتر اۋماقتاعى مۇز قاباتى السىرەتىلدى. جۇمىسقا تجد قىزمەتكەرلەرى، قۇتقارۋشىلار، «KazExploService» ج ش س ماماندارى جانە جەرگىلىكتى بيلىك وكىلدەرى قاتىستى.

گلۋبوكوە اۋدانىندا دا وسىنداي شارالار جۇرگىزىلدى. گلۋبوچانكا وزەنىنىڭ ساعاسىندا 3 232 شارشى مەتر اۋماقتا مۇز قاباتى بۇزىلدى. ساراپشىلاردىڭ ايتۋىنشا، مۇزدى الدىن الا بۇزۋ – سۋدىڭ ەركىن اعۋىنا مۇمكىندىك بەرىپ، تاسقىن ءقاۋپىن ازايتادى.

گلۋبوكوە كەنتىندە جانە بەلوۋسوۆكا، پراپورششيكوۆو، ۋۆاروۆا، پروگرەسس، چەرەمشانكا اۋىلدارىندا دا دايىندىق جۇمىستارى ءجۇرىپ جاتىر. بۇل ەلدى مەكەندەردە ارىق جۇيەلەرى تازارتىلىپ، جاڭا سۋ ارنالارى قازىلۋدا. سونداي-اق سۋ باسۋ ءقاۋپى بار ايماقتارعا قاجەتتى ماتەريالدار جەتكىزىلۋدە.

مۇنداي ءىس-شارالار سۋ تاسقىنىنىڭ سالدارىن بارىنشا ازايتۋعا باعىتتالعان جانە توتەنشە جاعدايلار قىزمەتىنىڭ تۇراقتى باقىلاۋىندا وتەدى. ماماندار قاجەتتى شارالاردى ۋاقتىلى قابىلداۋ ءۇشىن مۇز جاعدايىن باقىلاۋدى جالعاستىرۋدا.