شىعىس قازاقستان وبلىسىندا جىل سايىن جۇگەرى مەن سويانىڭ ەگىس القابىن ارتتىرۋ ارقىلى وسىمدىك شارۋاشىلىعى ونىمدەرىنىڭ ەكسپورتتىن كوبەيتۋ جوسپارلانىپ وتىر. بۇل جايلى شقو اۋىل شارۋاشىلىعى باسقارماسى باسشىسىنىڭ مىندەتىن اتقارۋشى ۆلاديمير گايلامازيان جۋرناليستەرگە بايانداپ بەردى.

– 2019 جىلى جۇگەرى القابى 6،9 مىڭ گەكتاردى قۇراسا، وسى جىلى 8،9 مىڭ گەكتارعا جەتتى. نەگىزگى اۋدانداردى اتاپ كورسەتسەك، ءۇرجاردا – 4 مىڭ گەكتار، شەمونايحادا – 1،8 مىڭ گەكتار، بورودۋليحادا – 1،4 مىڭ گەكتار جانە گلۋبوكوە اۋدانىندا – 1،3 مىڭ گەكتار. ياعني، بيىل وتكەن جىلمەن سالىستىرعاندا 3 مىڭ گەكتار ءوسىم بار. ال سويا 6،2 مىڭ گەكتارعا ەگىلدى. جالپى وڭىرىمىزدە سويا مەن جۇگەرىنىڭ ەگىس القابىن ارتتىرۋعا باعىتتالعان ايماقتىق باعدارلاما قۇرىلعان. جوسپار بويىنشا الداعى 2 جىلدىڭ ىشىندە داندىك جۇگەرىنىڭ القابى 15-18 مىڭ گەكتارعا دەيىن ارتتىرىلماق. 2025 جىلعا دەيىن سويا القابى 30 مىڭ گەكتارعا جەتەدى دەپ كوزدەلىپ وتىر، – دەدى ول.

ۆلاديمير گايلامازياننىڭ ايتۋىنشا، ايماقتىق باعدارلامانىڭ نەگىزگى ماقساتى – مالدى جوعارى ساپالى جەم-شوپپەن قامتاماسىز ەتۋ جانە وسىمدىك شارۋاشىلىعى ونىمدەرىن ەكسپورتقا شىعارۋ.

«مىسالى كورشى جۇڭگو ەلى جىل سايىن 98 ملن توننا سويانى، 12-15 ملن توننا جۇگەرىنى يمپورتتايدى. بۇل ءبىز ءۇشىن ۇلكەن نارىق. سوندىقتان سويا مەن جۇگەرى ءوسىرۋدىڭ قىر-سىرىن ءتۇسىندىرۋ ماقساتىندا قالالار مەن اۋداندارداعى اكىمدىك قىزمەتكەرلەرىنە جانە ءوڭىردىڭ اۋىل شارۋاشىلىق تاۋار وندىرۋشىلەرىنە ارنالعان سەمينار-ترەنينگتەر وتكىزىلۋدە. قاتىسۋشىلاردىڭ ءوتىنىشى بويىنشا وسىنداي شارالار بيىل دا جوسپارلانعان» دەيدى شقو اۋىل شارۋاشىلىعى باسقارماسى باسشىسىنىڭ مىندەتىن اتقارۋشى.