شىعىس قازاقستان وبلىسىندا شەنەۋنىكتەر ءبىر كوزدەن زاڭسىز كەلىسىم-شارتتار جاساعان، دەپ حابارلايدى Dalanews.kz.
وبلىستىق پروكۋراتۋرانىڭ مالىمەتىنشە، توتەنشە جاعدايلاردىڭ سالدارىن وقشاۋلاۋ جانە جويۋ ءۇشىن مەملەكەتتىك ساتىپ الۋ سالاسىندا 1،4 ملرد تەڭگەگە 78 كەلىسىمشارت زاڭسىز جاسالعان. بۇل شارتتاردى جاساۋ كەزەڭىندە تج جاريالانباعانى، تيىسىنشە ءبىر كوزدەن شارتتار جاساسۋعا نەگىز بولماعانى انىقتالدى.
اتاپ ايتقاندا، جەرگىلىكتى اكىمدىكتەر قاردى شىعارۋ، اكىمشىلىك عيماراتتاردى جوندەۋ، مۇزدان تازارتاتىن رەاگەنتتەر جانە تاعى باسقا تاۋارلاردى، جۇمىستاردى جانە قىزمەتتەردى ساتىپ العان.
قولدانىستاعى زاڭنامادا كوزدەلمەگەن جاعدايلاردا تىكەلەي شارت جاساسۋ ارقىلى ءبىر كوزدەن الۋ تاسىلىمەن مەملەكەتتىك ساتىپ الۋدى ىسكە اسىرعانى ءۇشىن لاۋازىمدى ادامدار اكىمشىلىك جاۋاپكەرشىلىككە تارتىلادى.
بۇگىنگە دەيىن شەنەۋنىكتەر 14 ملن تەڭگە كولەمىندە ايىپپۇل تولەدى.
