Shyǵys Qazaqstan oblysynda sheneýnikter bir kózden zańsyz kelisim-sharttar jasaǵan, dep habarlaidy Dalanews.kz.
Oblystyq prokýratýranyń málimetinshe, tótenshe jaǵdailardyń saldaryn oqshaýlaý jáne joiý úshin memlekettik satyp alý salasynda 1,4 mlrd teńgege 78 kelisimshart zańsyz jasalǵan. Bul sharttardy jasaý kezeńinde TJ jariialanbaǵany, tiisinshe bir kózden sharttar jasasýǵa negiz bolmaǵany anyqtaldy.
Atap aitqanda, jergilikti ákimdikter qardy shyǵarý, ákimshilik ǵimarattardy jóndeý, muzdan tazartatyn reagentter jáne taǵy basqa taýarlardy, jumystardy jáne qyzmetterdi satyp alǵan.
Qoldanystaǵy zańnamada kózdelmegen jaǵdailarda tikelei shart jasasý arqyly bir kózden alý tásilimen memlekettik satyp alýdy iske asyrǵany úshin laýazymdy adamdar ákimshilik jaýapkershilikke tartylady.
Búginge deiin sheneýnikter 14 mln teńge kóleminde aiyppul tóledi.
