شىعىس قازاقستان وبلىسىنا قاراستى قاسىم قايسەنوۆ كەنتىندە جاڭا ءۇش قاباتتى زاماناۋي ەمحانانىڭ قۇرىلىسى جۇرگىزىلىپ جاتىر. قازىرگى ۋاقىتتا قۇرىلىس جۇمىستارىنىڭ 70%-ى اياقتالعان،- دەپ حابارلايدى Dalanews.kz
وبلىستىق قۇرىلىس باسقارماسىنىڭ مالىمەتىنە سۇيەنسەك، نىساندى پايدالانۋعا بەرۋ 2025 جىلدىڭ قاراشا ايىنا جوسپارلانعان. جاڭا مەديسينالىق مەكەمە كۇنىنە 150 ادامدى قابىلداۋعا قاۋقارلى بولادى. مۇندا كەڭەس بەرۋ-دياگنوستيكالىق جانە الدىن الۋ بولىمشەلەرى، سونداي-اق كۇندىزگى ستاسيونار پالاتالارى قاراستىرىلعان.
جاڭا ەمحانا ۇلان اۋدانىنىڭ تۇرعىندارىنا قىزمەت كورسەتەتىن بولادى. قازىرگى تاڭدا ەمحاناعا تىركەلگەن حالىق سانى 29 498 ادامدى قۇرايدى.
"قۇرىلىس جۇمىستارى جوسپارعا سايكەس جۇرگىزىلۋدە. ءبىز بۇل الەۋمەتتىك ماڭىزى زور جوبانىڭ ساپالى ءارى مەرزىمىندە اياقتالۋىن قامتاماسىز ەتۋگە جاۋاپتىمىز. بۇگىندە عيماراتقا جىلۋ جۇيەسى مەن سۋمەن جابدىقتاۋ جۇيەسى تارتىلدى، تەرەزەلەر مەن ەسىكتەردى ورناتۋ جۇمىستارى جالعاسۋدا. سونداي-اق قابىرعالار مەن ەدەندەردى قاپتاۋ بويىنشا ارلەۋ ءجۇرىپ جاتىر. كوكتەمدە مەديسينالىق مەكەمە اينالاسىن اباتتاندىرۋ باستالادى"، — دەپ مالىمدەدى مەردىگەر ۇيىم وكىلدەرى.
جاڭا ەمحانانىڭ مۇمكىندىكتەرى كەڭ بولماق. مۇندا فليۋوروگرافيا، رەنتگەن، مامموگرافيا، ەندوسكوپيا كابينەتتەرى، سونداي-اق مەديسيناداعى ءار سالا ماماندارىنىڭ كابينەتتەرى (وتورينولارينگولوگ، وفتالمولوگ، دەرماتولوگ، نيەۆروپاتولوگ، كارديولوگ، ونكولوگ، اكۋشەر-گينەكولوگ، حيرۋرگ، تراۆماتولوگ، فتيزياتر، جالپى تاجىريبەلىك دارىگەرلەر) جۇمىس ىستەيتىن بولادى.
سونىمەن قاتار، زەرتحانالىق دياگنوستيكا ءبولىمى دە اشىلىپ، وندا ميكروبيولوگيالىق، سەرولوگيالىق جانە جالپى كلينيكالىق زەرتتەۋلەر جۇرگىزىلەدى.
جاڭا ەمحانا ۇلان اۋدانى تۇرعىندارى ءۇشىن مەديسينالىق قىزمەتتەردىڭ قولجەتىمدىلىگىن ارتتىرىپ، ساپالى ءارى زاماناۋي مەديسينالىق كومەك كورسەتۋگە مۇمكىندىك بەرەدى.
