شىعىس قازاقستان وبلىسىندا 28 ءساۋىر مەن 8 مامىر ارالىعىندا ۇلى وتان سوعىسىنا قاتىسۋشىلار مەن مۇگەدەكتەرىنە قولداۋ كورسەتۋ ماقساتىندا «ارداگەرىم – ارداعىم» اكسياسى ءوتىپ جاتىر،– دەپ حابارلايدى Dalanews.kz

بيىل بۇل يگى باستاماعا 300-دەن استام ۆولونتەر قوسىلىپ، ارداگەرلەرگە كومەك كورسەتۋگە باعىتتالعان ءتۇرلى ءىس-شارالارعا بەلسەنە قاتىسۋدا.

اكسيا اياسىندا ايماقتا 24 ءىس-شارا وتكىزىلدى. ونىڭ ىشىندە ارداگەرلەردىڭ ءۇيىنىڭ اۋلاسى تازارتىلىپ، تىل ەڭبەككەرلەرى مەن ارداگەرلەرگە ەستەلىك سىيلىقتار مەن ازىق-تۇلىك سەبەتتەرى تابىستالدى. ۆولونتەرلەر تەك ءىس جۇزىندە كومەكتەسىپ قانا قويماي، ءاربىر ارداگەرگە ەرەكشە كوڭىل ءبولىپ، قامقورلىق پەن قۇرمەت ءبىلدىردى.

ۇيىمداستىرۋشىلاردىڭ ايتۋىنشا، اكسيا اياسىنداعى جۇمىستار جالعاسىن تابادى جانە اۋقىمى ۇلعايا تۇسەدى. بەلسەندىلەر باتىر بابالارىمىزدىڭ ەرلىگىن ۇمىتپاي، ازاتتىق پەن بولاشاق ءۇشىن كۇرەسكەن جاندارعا قولداۋ كورسەتۋدىڭ ماڭىزىن اتاپ وتۋدە.

ايتا كەتەيىك، «ارداگەرىم – ارداعىم» اكسياسى 8 مامىرعا دەيىن جالعاسىپ،  اۋداندىق دەڭگەيدەگى ەلدى مەكەندەردى دە قامتيدى.