شىعىس قازاقستان وبلىسىندا ءداندى جانە مايلى داقىلداردىڭ ءونىمى ءبىرشاما ءوستى. بۇل تۋرالى شىعىس قازاقستان وبلىستىق ءماسليحاتىنىڭ كەزەكتى XVI سەسسياسىندا وبلىس اكىمى ەرمەك كوشەربايەۆ مالىمدەدى، دەپ حابارلايدى Dalanews.kz. 

– اگروونەركاسىپتىك كەشەندە ونىمدىلىك ارتتىرۋ ءونىمدى قايتا وڭدەۋ، يمپورتتى الماستىرۋ باسىمدىققا يە. بيىل اگروونەركاسىپ كەشەن ونىمدەرىن ەكسپورتتاۋداعى قايتا وڭدەلگەن ءونىمنىڭ ۇلەسى 37،6%-دان 67،5%-عا دەيىن ۇلعايدى. ءداندى جانە مايلى داقىلدارىنىڭ نەگىزى تۇرلەرى بويىنشا ءونىم ءبىرشاما وسكەنىن كورەمىز. بيىل بارلىعى 38،3 ملرد تەڭگەگە اگروونەركاسىپ كەشەنىنىڭ 15 جوباسى ىسكە اسىرىلىپ جاتىر. سونىڭ ىشىندە 1،7 ملرد تەڭگەگە 8 جوبا ىسكە قوسىلدى. ناتيجەسىندە سۋ ۇنەمدەۋ تەحنولوگيالارىن قولداناتىن الاڭ 8،9 مىڭ گەكتاردى قۇرادى نەمەسە وتكەن جىلمەن سالىستىرعاندا 50%-عا ياعني، 3 مىڭ گەكتارعا ءوستى. سۋارمالى ەگىن شارۋاشىلىعىن دامىتۋ ءۇشىن «ERTIS BEREKE OSKEMEN» ج ش س بىرلەسكەن كاسىپورنى قۇرىلدى، ول «ەرتىس» الەۋمەتتىك-كاسىپكەرلىك كورپوراسياسى» جانە «SPACETIME» جەكە سەرىكتەستىگىنىڭ قولداۋىمەن «SuBereke» ماركالى برەندپەن وتاندىق جاڭبىرلاتۋ قوندىرعىلارىن شىعاراتىن بولادى، - دەيدى ەرمەك كوشەربايەۆ.

وسكەمەندە «ALTAI MAI» ج ش س مۇناي ءوندىرۋ زاۋىتىنىڭ قۇرىلىسى اياقتالۋدا. سونىمەن قاتار، سولتۇستىك قازاقستان وبلىسىنىڭ تاجىريبەسى نەگىزىندە جىلىنا 36 مىڭ توننا ءسۇت وندىرەتىن بەس ءتاۋارلى-سۇت فەرماسىنىڭ قۇرىلىسى جۇرگىزىلىپ جاتىر. قۋاتتىلىعى 4 مىڭ توننا بولاتىن تاعى ءبىر شارۋا قوجالىعىنىڭ قۇرىلىسى بويىنشا دا كونكۋرستىق راسىمدەر جۇرگىزىلۋدە.

«اۋىل اماناتى» باعدارلاماسى اياسىندا 2024 جىلى اۋىل شارۋاشىلىعى مەن ءتۋريزمدى دامىتۋعا 5،6 ملرد تەڭگە كولەمىندە نەسيە بەرۋ جوسپارلانعان.

بيىل رەسپۋبليكالىق بيۋدجەتتەن اۋىل شارۋاشىلىعى ونىمدەرىن قايتا وڭدەۋدى جانە ءتۋريزمدى دامىتۋدىڭ باسىم باعىتتارى ءۇشىن 1 ملرد تەڭگە ءبولىندى.