شقو دەنساۋلىق ساقتاۋ باسقارماسىنىڭ مالىمەتى بويىنشا، بۇگىنگى كۇنى وبلىس بويىنشا 12 جاستان 18 جاسقا دەيىنگى جاسوسپىرىمدەر، جۇكتىلىگى 16-37 اپتا ارالىعىنداعى ايەلدەر، بالا ەمىزەتىن ايەل ساناتتارىنداعى 52 770 ادام Pfizer ۆاكسيناسىمەن ەكپە الدى.
ولاردىڭ 48 مىڭنان استامى – جاسوسپىرىمدەر، 1 100-گە جۋىعى جۇكتى جانە 3700-دەن استامى بالا ەمىزەتىن ايەلدەر. ۆاكسينانىڭ ەكىنشى كومپونەنتىمەن 6 400 ادام ۆاكسيناسيالاندى.
اتاپ وتەيىك، 12-دەن 18 جاسقا دەيىنگى بالالاردى ۆاكسينالاۋ تەك قانا اتا-اناسىنىڭ نەمە ءجاسوسپىرىمنىڭ زاڭدى وكىلدەرىنىڭ رەسمي رۇقساتى ارقىلى جۇرگىزىلۋدە.
– ءار اتا-انانى بالاسىنىڭ بولاشاعى الاڭداتادى، سوندىقتان، مەنىڭ ويىمشا، ءبىزدىڭ باستى ماقساتىمىز – بالامىزدى كورونوۆيرۋس ينفەكسياسىنان ساقتاۋ. قورقۋدىڭ قاجەتى جوق، جالعان اقپاراتتارعا بوي بەرمەۋ كەرەك. مەنىڭ ۇلىم Pfizer ۆاكسيناسىنىڭ ءبىرىنشى كومپونەنتىن الدى، ءوزىن جاقسى سەزىنۋدە، – دەدى قالباتاۋ اۋىلىنىڭ تۇرعىنى اللا تايمانوۆا.
دارىگەرلەردىڭ مالىمەتى بويىنشا، جاڭا زەرتتەۋلەر Pfizer ۆاكسيناسىنىڭ ءقاۋىپسىز ەكەنىن جانە جۇكتى ايەلدەرگە كەرى اسەر ەتپەيتىنىن كورسەتەدى. جۇكتىلىك كەزىندە كورونوۆيرۋسپەن ناۋقاستانۋ ءقاۋىپتى جانە بۇل جاعدايدا ينفەكسيا اۋىر اسقىنۋى مۇمكىن.
– مەن كورونوۆيرۋسپەن ستاسيونارعا ءتۇستىم، رەنتگەن تۇسىرىلىمىندە وكپەمنىڭ 20 پايىزى قابىنعانى كورىندى. مەن ءقازىر ەم قابىلداۋدامىن، تىنىس الۋىم اقىرىنداپ قالىپقا كەلە جاتىر. بولاشاق انالارعا ايتقىم كەلەدى، ءتيىستى شارالاردىڭ بارلىعىن قابىلداپ، ءوز دەنساۋلىقتارىڭىزدى جانە بولاشاق بالالارىڭىزدى قورعاڭىزدار. دارىگەرلەرمەن كەڭەسىڭىزدەر، ەكپەنى قاي ۋاقىتتا العان دۇرىس بولتانىن بىلىڭىزدەر. بۇل كۇتپەگەن جەردە ستاسيونارعا تۇسۋدەن قورعايدى. اۋىرۋدى جەڭۋ وتە اۋىر، – دەدى وبلىس تۇرعىنى ليۋدميلا كوتيكوۆا.
