ىندەتپەن كۇرەسۋ بارىسىندا كورسەتكەت قولداۋى مەن تانىتقان ەرلىكتەرى ءۇشىن وبلىستىڭ بەتكە ۇستار ازاماتتارى العىسقا بولەندى. ولاردىڭ ىشىندە ءىرى كومپانيا وكىلدەرى، جۋرناليستەر، قوعام بەلسەندىلەرى، دارىگەرلەر مەن ءتارتىپ ساقشىلارى بار. جالپى، شقو-نىڭ 100-گە جۋىق تۇرعىنى "حالىق العىسى" ماراپاتىنا يە بولدى.
- قاسىم-جومارت كەمەل ۇلى قيىن-قىستاۋ كەزەڭدە مەملەكەت قويعان مىندەتتەردى ادال ورىنداعانى ءۇشىن ولاردىڭ ءارقايسىسىنا العىس ايتتى.
كوروناۆيرۋس ينفەكسياسىمەن كۇرەستە ۇلكەن جۇكتەمە اسىرەسە، مەديسينالىق جانە سانيتارلىق-ەپيدەميولوگيالىق سالا قىزمەتكەرلەرىنىڭ يىعىنا ارتىلدى.
سونداي-اق، پوليسەيلەر مەن اسكەريلەر، ەرىكتىلەر مەن جۋرناليستەر دە كۇش-جىگەرلەرىن اياعان جوق. اسىرەسە، جومارتتىق تانىتقان ءوڭىردىڭ ءىرى كومپانيالارى مەن كاسىپكەرلەرى سۇبەلى ۇلەس قوستى. مەن سىزدەردىڭ ءارقايسىڭىزعا زور ريزاشىلىعىمدى بىلدىرەمىن، - دەدى وبلىس اكىمى قۇتتىقتاۋ سوزىندە.
جالپى، ەلىمىزدە توتەنشە جاعداي جاريالانعان كەزدەن باستاپ وبلىستا ەرىكتىلەر مەن بيزنەس وكىلدەرى جۇمىسسىز قالعان وتباسىلارعا، زەينەتكەرلەر مەن كوپ بالالى وتباسىلارعا بارىنشا كومەك كورسەتىپ، ازىق-تۇلىكپەن قامتاماسىز ەتتى.
«BIRGEMIZ» قوعامدىق قورى بەلگىلەگەن ەلۋ مىڭ تەڭگەنى قۇرايتىن جاردەماقى 40 مىڭنان استام وتباسىعا بەرىلدى.
وڭىردەگى ءىرى كومپانيالاردىڭ ءبىرى، «حالىق العىسى» مەدالىن يەلەنگەن «قازمىرىش» اق-نىڭ اكىمشىلىك ماسەلەلەرى بويىنشا اتقارۋشى ديرەكتورى اندرەي لازاريەۆتىڭ ايتۋىنشا، كاسىپورىندا قىزمەتكەرلەردى قىسقارتۋعا جول بەرىلمەي، وسى ۇجىمدا ەڭبەك ەتكەن ارداگەرلەردىڭ ۇيىنە كەرەكتى ازىق-تۇلىكتەر ۇنەمى جەتكىزىلىپ تۇردى. – قازىردە الەمدى شارپىعان ىندەت بارلىعىمىزعا وڭاي ءتيىپ وتىرعان جوق. سوندىقتان ءبىر-بىرىمىزدى قولداپ، كومەك قولىن بەرۋىمىز كەرەك. اتالمىش پروبلەمامەن ەشكىم بەتپە-بەت قالماۋى كەرەك، - دەيدى كومپانيا وكىلى.
وبلىس اكىمى دانيال احمەتوۆ جيىن سوڭىندا شىعىسقازاقستاندىقتاردى بارلىق ساقتىق شارالارىن ساقتاۋعا شاقىردى.
– COVID-19 ىندەتىنە شالدىققاندار سانى كۇن ساناپ ارتىپ كەلەدى. تۇرعىندار بارىنشا ساقتىق شارالارىن ساقتاپ، قورعانۋ كەرەك. بۇگىنگى تاڭدا وبلىستاعى ناۋقاستار سانى 500-گە جەتتى. ۆيرۋس اۋدانداردا دا كەڭىنەن تارالىپ كەلەدى. بوساڭسۋعا ءالى ەرتە، بۇنى بارلىعىمىز دۇرىس ءتۇسىنۋىمىز كەرەك، - دەدى ايماق باسشىسى.
