الدىمەن وبلىس باسشىسى جاڭا وبلىس ورتالىعىنىڭ دامۋ جوسپارىمەن تانىستىردى.
– ەلباسى ن.نازاربايەۆتىڭ باستاماسىمەن جاڭا تۇركىستان وبلىسى قۇرىلىپ، ونىڭ ورتالىعى رەتىندە كونە تۇركىستان قالاسى بولىپ بەكىتىلدى. كۇللى تۇركى حالىقتارىنىڭ رۋحاني ءتۇپ قازىعى سانالاتىن تۇركىستاندا يسلام الەمىنىڭ جارقىن تۇلعاسى ياساۋي، سونداي-اق كۇللى قازاق حالقىنىڭ تۇلعالارى ماڭگىلىك مەكەن تاپقان. كەشەگى ۇلى جىبەك جولى، بۇگىندە باتىس قىتاي-باتىس ەۋروپا ماگيسترالى بويىندا ورنالاسقان تاريحي قالانىڭ قازىرگى تاڭدا ەكىنشى ءومىرى باستالدى. ياساۋي كەسەنەسى تۋريستەر ءۇشىن «رۋحاني ورتالىق» رەتىندە قايتا جاڭعىراتىن بولادى. بۇدان وزگە، «اكىمشىلىك-ىسكەرلىك ورتالىق» بوي كوتەرەدى. شاھاردىڭ الەمدىك بايلانىسىن ارتتىرۋ ءۇشىن تەمىر جول، اۋە قاتىناستارى قارقىندى داميدى. الداعى جىلى جاڭا اۋەجاي سالىنادى. بولاشاقتا سامارقاند-بۇقارا-تۇركىستان تۋريستىك باعىتىن قالىپتاستىرۋ جوسپارلانىپ وتىر، – دەدى ءومىرزاق ەستاي ۇلى.
سونداي-اق، ايماق باسشىسى وڭىرگە تۋريزم سالاسىنان بولەك، اۋىل شارۋاشىلىعى، ءوندىرىس سالاسىنا ينۆەستيسيا سالۋ ءتيىمدى ءارى قولايلى ەكەندىگىن جەتكىزدى.
ءوز كەزەگىندە ۇلىبريتانيا ەلشىسى مايكل گيففورد تۇركىستان قالاسىندا ءامىر تەمىر سالدىرعان ياساۋي كەسەنەسى تۋريستەر ءۇشىن كونەلىگىمەن، تاريحي باعاسىمەن قۇندى ەكەنىن ايتتى.
– تۇركىستان قالاسىنداعى ياساۋي كەسەنەسى يۋنەسكو سىندى حالىقارالىق ۇيىمنىڭ تىزىمىنە ەنگەن ورتا ازياداعى باعا جەتپەس جاۋھارلاردىڭ ءبىرى. وسىنىڭ ءوزى الەم تۋريستەرىن قىزىقتىرادى. ءقازىر تۋريستەر ءۇشىن كونە زاماننان بەرى سول قالپىندا ساقتالعان جادىگەرلەر قۇندى. الداعى ۋاقىتتا ءبىزدىڭ تۋريستىك كومپانيالار ارىپتەستىك تانىتۋعا دايىن. سونداي-اق، ءوڭىردىڭ اۋىل شارۋاشىلىعى سالاسىندا بريتاندىق جاڭا تەحنولوگيالاردى ەنگىزۋ بويىنشا كەلىسىم ورنايدى، – دەدى ەلشى.
كەزدەسۋ سوڭىندا وبلىس اكىمى شەتەلدىك ەلشىنى تۇركىستان قالاسىنا جاساعان العاشقى ساياحاتىمەن قۇتتىقتاپ، سىي-سىياپات جاسادى.
تۇركىستان وبلىسى اكىمىنىڭ باسپا ءسوز قىزمەتى
