قازاقستاندا ءتۇن ورتاسىنا دەيىن جۇمىس ىستەيتىن تاعى ەكى حقكو پايدا بولدى. «ازاماتتارعا ارنالعان ۇكىمەتتىڭ» حقكو-لاردىڭ ءتۇن ورتاسىنا دەيىنگى جۇمىسى بويىنشا پيلوتتىق جوباسى جالعاسۋدا. ەندى مەملەكەتتىك قىزمەتتى الۋعا ءوتىنىش بەرۋ نەمەسە دايىن انىقتامانى الۋ مۇمكىندىگىن تەك استانالىقتار عانا ەمەس، الماتى جانە شىمكەنت قالالارىنىڭ تۇرعىندارى دا الا الادى. بۇل تۋرالى "ازاماتتارعا ارنالعان ۇكىمەت" كوممەرسيالىق ەمەس اق باسپا ءسوز قىزمەتى حابارلادى.
«ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتوراعاسى ابىلايحان وسپانوۆتىڭ ايتۋىنشا، العاشقى رەت تۇنگى ساعات 12-گە دەيىنگى جۇمىس كەستەسى ىسكە قوسىلعان ساۋران، 7 مەكەنجايىنداعى استانالىق حالىققا قىزمەت كورسەتۋ ورتالىعى قازىرگى كەزدە بارشاعا تانىمال. «ءبىز پيلوتتىق جوباعا مۇقيات مونيتورينگ جۇرگىزدىك. ونى ىسكە قوسقان ساتتەن باستاپ ساع. 20:00 مەن 24:00 ارالىعى كەزەڭىندە مەملەكەتتىك قىزمەت كورسەتۋگە شامامەن ەكى مىڭ ءوتىنىش قابىلدانىپ، 506 قۇجات بەرىلگەن. وسىنداي سۇرانىستى كورىپ، ءبىز ءتۇن ورتاسىنا دەيىنگى جۇمىس كەستەسىن شىمكەنت جانە الماتى قالالارىنداعى بولىمدەردە دە ەنگىزۋدى شەشتىك، سەبەبى بۇل ەكى قالا حالىق سانى بويىنشا ەڭ ۇلكەن قالالار»، - دەدى ا.وسپانوۆ.
جۇمىس كەستەسى دۇيسەنبى مەن جۇما ارالىعىندا ساع. 08:00-دەن 24:00-گە دەيىنگى فرونت-وفيستەر استانا ق. ساۋران 7، الماتى ق.، اۋەزوۆ اۋدانى، جاندوسوۆ ك-سى، 51، شىمكەنت ق.، قاراتاۋ اۋدانى، نۇرسات مولتەك اۋدانى، 24 مەكەنجايلارى بويىنشا ورنالاسقان. ايتپاقشى، قىزمەتتى الۋشىلارعا ىڭعايلى بولۋ ءۇشىن، مەملەكەتتىك باج سالىعىن وسى بولىمدەردە ساع. 24:00-گە دەيىن تولەۋگە بولادى، سەبەبى كاسسالار دا ءتۇن ورتاسىنا دەيىنگى جۇمىس رەجيمىنە اۋىستىرىلعان. سەنبى كۇنى بۇل بولىمدەر ساع. 20:00-گە دەيىن جۇمىس ىستەيدى.
