Qazaqstanda tún ortasyna deıin jumys isteıtin taǵy eki HQKO paıda boldy. «Azamattarǵa arnalǵan úkimettiń» HQKO-lardyń tún ortasyna deıingi jumysy boıynsha pılottyq jobasy jalǵasýda. Endi memlekettik qyzmetti alýǵa ótinish berý nemese daıyn anyqtamany alý múmkindigin tek astanalyqtar ǵana emes, Almaty jáne Shymkent qalalarynyń turǵyndary da ala alady. Bul týraly "Azamattarǵa arnalǵan úkimet" komersıalyq emes AQ baspasóz qyzmeti habarlady.
«Azamattarǵa arnalǵan úkimet» memlekettik korporasıasynyń Basqarma tóraǵasy Abylaıhan Ospanovtyń aıtýynsha, alǵashqy ret túngi saǵat 12-ge deıingi jumys kestesi iske qosylǵan Saýran, 7 mekenjaıyndaǵy astanalyq Halyqqa qyzmet kórsetý ortalyǵy qazirgi kezde barshaǵa tanymal. «Biz pılottyq jobaǵa muqıat monıtorıń júrgizdik. Ony iske qosqan sátten bastap saǵ. 20:00 men 24:00 aralyǵy kezeńinde memlekettik qyzmet kórsetýge shamamen eki myń ótinish qabyldanyp, 506 qujat berilgen. Osyndaı suranysty kórip, biz tún ortasyna deıingi jumys kestesin Shymkent jáne Almaty qalalaryndaǵy bólimderde de engizýdi sheshtik, sebebi bul eki qala halyq sany boıynsha eń úlken qalalar», - dedi A.Ospanov.
Jumys kestesi dúısenbi men juma aralyǵynda saǵ. 08:00-den 24:00-ge deıingi front-ofıster Astana q. Saýran 7, Almaty q., Áýezov aýdany, Jandosov k-si, 51, Shymkent q., Qarataý aýdany, Nursat móltek aýdany, 24 mekenjaılary boıynsha ornalasqan. Aıtpaqshy, qyzmetti alýshylarǵa yńǵaıly bolý úshin, memlekettik baj salyǵyn osy bólimderde saǵ. 24:00-ge deıin tóleýge bolady, sebebi kasalar da tún ortasyna deıingi jumys rejımine aýystyrylǵan. Senbi kúni bul bólimder saǵ. 20:00-ge deıin jumys isteıdi.
