ەسكەرتكىشتىڭ اشىلۋ راسىمىندە العاشقى بولىپ ءسوز العان وبلىس باسشىسى جانسەيىت قانسەيىت ۇلى جاڭا نىساننىڭ ءمان-ماڭىزىنا توقتالىپ، ىشكى ىستەر ورگاندارى قىزمەتكەرلەرىنىڭ ءتول مەرەكەسىمەن قۇتتىقتادى.
– قوعامدىق ءتارتىپتى قالىپتاستىرۋ، ەل تىنىشتىعىن قورعاۋ جولىنداعى قاجىرلى ەڭبەكتەرىن ەسكەرە وتىرىپ، قازا تاپقانداردىڭ قۇرمەتىنە وراي ەسكەرتكىش قويۋدى ءجون كوردىك. بۇگىنگى ۇرپاققا ۇلاعات، بولاشاققا امانات ەتۋدى ماقسات ەتكەن بۇل نىسان وتكەنگە تاعزىم بولارى ءسوزسىز. ارينە ەرلىكپەن قازا تاپقان باتىرلارىمىزدى ەشبىر ەسكەرتكىشپەن الماستىرا المايمىز. ەلدىڭ تىنىشتىعى جولىندا جانىن قۇربان ەتكەن ەرجۇرەك، باتىل ەرلەر ەشقاشان ەل جادىنان شىقپايدى. قۇرمەتتى پوليسيا قىزمەتكەرلەرى! ءارقاشان انتتارىڭىزعا ادال بولىپ، ەل قورعانى دەگەن اتاققا ابىرويلى قىزمەت ەتە بەرىڭىزدەر! ەلىمىز تىنىش، حالقىمىز امان، تاۋەلسىزدىگىمىز تۇعىرلى بولسىن، – دەدى وبلىس اكىمى.
سالتاناتتى شارا اياسىندا وبلىستىق ىشكى ىستەر دەپارتامەنتىنىڭ جەكە اپپارات قۇرامى سالتاناتتى شەرۋمەن ءجۇرىپ ءوتتى. سونداي-اق، شاراعا قاتىسۋشىلار ءىىد مۋزەيىن تاماشالادى.
كەيىن «قوعامدىق كەلىسىم» مەكەمەسىنىڭ عيماراتىندا پوليسيا سالاسىندا ارنالعان فوتو كورمە ۇيىمداستىرىلدى. ۇزدىك پوليسيا قىزمەتكەرلەرى ماراپاتتالىپ، شارا سوڭى مەرەكەلىك كونسەرتكە ۇلاستى.
تۇركىستان وبلىسى اكىمىنىڭ باسپا ءسوز قىزمەتى
