ءۇشىنشى مەگوپوليستە ىندەتتىڭ تارالۋى ازايىپ، ينفەكسيالىق ستاسيونارداعى توسەك ورىنداردىڭ باسىم بولىگى قىسقارتىلدى.
دەنساۋلىق ساقتاۋ ماماندارىنىڭ ايتۋىنشا بۇل – يممۋنداۋ شاراسىنىڭ ناتيجەسى.
شىمكەنت قالاسى كوروناۆيرۋسقا قارسى ۆاكسينا سالدىرۋ بويىنشا باستاپقى 100 پايىز جوسپاردى ورىندادى.
بۇگىنگى كۇنى ۆاكسينالاۋعا جاتاتىن 536 مىڭ ازاماتتىڭ بارلىعى ىندەتكە قارسى ەكپەنىڭ ءى كومپونەنتىن سالدىرعان.
بۇعان قوسا بۇل كاتەگورياعا قوسىمشا 60 مىڭ ادام قوسىلعان. ال، ءىى كومپونەنتىن 454 848 ادام العان.
ايتا كەتەيىك، قالاداعى مەملەكەتتىك جانە جەكەمەنشىك ەمحانالاردا كوۆيدكە قارسى ۆاكسيناسيالاۋ جۇمىستارى اپتانىڭ جەتى كۇنىندە ساعات 08.00-دەن كەشكى 20.00-گە دەيىن جۇمىس ىستەيدى.
شىمكەنت قالاسى اكىمدىگىنىڭ باسپا ءسوز قىزمەتى
