وڭتۇستىك قازاقستان وبلىسىنىڭ اكىمى ج.تۇيمەبايەۆ جۇڭگو ەلىنىڭ دەلەگاسياسىمەن كەزدەستى. جيىندا قىتايلىق «شانحاي كونستراكشن» كومپانياسىنىڭ وكىلدەرى ءوڭىر باسشىسىنا «شىمكەنت سيتي» قالاشىعىنىڭ ماڭىندا سالىناتىن تۇرعىن ءۇي كەشەنىنىڭ جوباسىن تانىستىردى.

ايتا كەتۋ كەرەك، اتالعان كومپوزيسيانىڭ ورتالىعى رەتىندە توبەسى كوك تىرەگەن 57 قاباتتان تۇراتىن ەكى كوپقاباتتى ءۇي قاراستىرىلۋدا. «شانحاي-تاۋەر» جانە «شىمكەنت-تاۋەر» دەپ اتالاتىن مۇنارالار اتالعان ەكى قالانىڭ دوستىق سيمۆولى ىسپەتتەس بولماق. جوبانىڭ جالپى كولەمى 300 مىڭ شارشى مەتردەن استام. قىتايلىق ينۆەستورلاردىڭ ايتۋىنشا، اتالعان تۇرعىن ءۇي كەشەنىن سالۋ يدەياسى شىعىس پەن باتىس كوپەستەرىنىڭ ەجەلگى ساۋدا جولى بولعان ۇلى جىبەك جولىنىڭ تاريحىنا نەگىزدەلگەن. بۇل جولدىڭ بويىنداعى شاھارلاردىڭ ءبىرى قازىرگى شىمكەنت قالاسى. ال تۇرعىن ءۇي كەشەنىندە ۇلى جىبەك جولىنداعى كونە قالالار - وتىرار، ساۋران، سىعاناق، سايرام، سوزاق اتىمەن اتالاتىن ەجەلگى ورامدار (كۆارتال) سالىنباق.

كاسىپكەرلەرمەن بولعان كەزدەسۋدە وبلىس اكىمى ءوڭىرىمىزدىڭ بۇگىنگە دەيىن جەتكەن جەتىستىكتەرى مەن ينۆەستيسيالىق مۇمكىندىكتەرىن اتاپ ءوتىپ، اسىرەسە، ايماقتا وتاندىق جانە شەتەلدىك ينۆەستورلار ءۇشىن قولايلى جاعداي جاسالعانىن جەتكىزدى. مۇنان بولەك، ول اكىمدىكتىڭ اتالعان جوبانى قولدايتىنىن جانە ونى ىسكە اسىرۋدا جان-جاقتى قولداۋلاردىڭ بولاتىنىن ايتتى.