Aıta ketý kerek, atalǵan kompozısıanyń ortalyǵy retinde tóbesi kók tiregen 57 qabattan turatyn eki kópqabatty úı qarastyrylýda. «Shanhaı-Taýer» jáne «Shymkent-Taýer» dep atalatyn munaralar atalǵan eki qalanyń dostyq sımvoly ispettes bolmaq. Jobanyń jalpy kólemi 300 myń sharshy metrden astam. Qytaılyq ınvestorlardyń aıtýynsha, atalǵan turǵyn úı keshenin salý ıdeıasy shyǵys pen batys kópesteriniń ejelgi saýda joly bolǵan Uly Jibek jolynyń tarıhyna negizdelgen. Bul joldyń boıyndaǵy shaharlardyń biri qazirgi Shymkent qalasy. Al turǵyn úı kesheninde Uly Jibek jolyndaǵy kóne qalalar - Otyrar, Saýran, Syǵanaq, Saıram, Sozaq atymen atalatyn ejelgi oramdar (kvartal) salynbaq.
Kásipkerlermen bolǵan kezdesýde oblys ákimi óńirimizdiń búginge deıin jetken jetistikteri men ınvestısıalyq múmkindikterin atap ótip, ásirese, aımaqta otandyq jáne sheteldik ınvestorlar úshin qolaıly jaǵdaı jasalǵanyn jetkizdi. Munan bólek, ol ákimdiktiń atalǵan jobany qoldaıtynyn jáne ony iske asyrýda jan-jaqty qoldaýlardyń bolatynyn aıtty.
