قما شىمكەنت قالاسى بويىنشا دەپارتامەنتى «شىمكەنت جاستار تەاترى» مكقك ديرەكتورى مەن وزگە دە لاۋازىمدى تۇلعالارعا قاتىستى 136 ملن تەڭگەدەن استام كولەمىندەگى بيۋدجەت قاراجاتىن جىمقىرۋ فاكتىسى بويىنشا تەرگەۋدى اياقتادى، دەپ حابارلايدى Dalanews.kz.

مەملەكەتتىك بيۋدجەتتەن كونسەرت وتكىزۋگە ارنالعان جابدىقتاردى (سونىڭ ىشىندە كولونكالار، سابۆۋفەرلەر، ساحنالىق فەرما، كۇشەيتكىشتەر، ميكروفوندار جانە ت.ب.) ساتىپ الۋعا 320 ملن تەڭگە بولىنگەن.

الايدا ساتىپ الۋ تالاپتارىن بۇزا وتىرىپ، لوتتاردى قولدان بولشەكتەۋ ارقىلى 20-دان استام اتاۋ بويىنشا ساتىپ الۋ ەلەكتروندى دۇكەن ارقىلى جۇرگىزىلگەن.

ەلەكتروندى ساۋدا الاڭى ارقىلى جابدىقتى ناقتى جەتكىزبەگەن جالعان جەكە كاسىپكەرلەرمەن كەلىسىمشارتتار جاسالىپ، قاراجات قولما-قول اقشاعا اينالدىرىلعان.

كۇدىكتىلەردىڭ ءبىرى قىلمىستىق جولمەن الىنعان تابىسقا جالپى قۇنى 48 ملن تەڭگەنى قۇرايتىن اۆتوكولىك پەن پاتەر ساتىپ الىپ، مۇلىكتى جاسىرۋ ماقساتىندا ولاردى سەنىمدى ادامداردىڭ اتىنا راسىمدەگەن.

سوتتىڭ سانكسياسىمەن اتالعان مۇلىككە تىيىم سالىندى.

كۇدىكتىلەر قاماۋعا الىندى.