شىعىستا ۇلتتىق دومبىرا كۇنى اتالىپ ءوتتى. مەرەكەلىك ءىس-شارالار تاۋلىك بويى جالعاستى.
كەشكىسىن وبلىستىق ساۋلەت-ەتنوگرافيالىق جانە تابيعي-لاندشافت مۋزەيىنىڭ الاڭىندا ەلىمىزدىڭ ۇزدىك دومبىراشىلارى مەن ەسترادا جۇلدىزدارى ونەر كورسەتتى.
ايتا كەتەلىك ۇلتتىق دومبىرا كۇنى العاش رەت بىلتىرعى جىلى تويلاندى، مۇنداعى ماقسات ۇلتتىق قۇندىلىقتاردى ۇلىقتاۋ، قازاقتىڭ تاريحى مەن مادەنيەتىن دارىپتەۋ.
دومبىرا مەن كۇي ونەرى ادامزاتتىڭ مادەني مۇراسى رەتىندە يۋنەسكو تىزىمىنە ەنگەن. وسىناۋ ايتۋلى كۇنى قازاقتىڭ ۇلتتىق اسپابىنان كۇمبىرلەپ شىعار قوڭىر ءۇندى ەستىپ، كۇي قۇدىرەتىنەن قۋات الۋ ءۇشىن مۋزەي-قورىقتىڭ الدىنا جينالعان وسكەمەن تۇرعىندارى كەشتەن ەرەكشە اسەر الدى.
شقو اكىمى سيمفونيكالىق وركەسترىنىڭ جەتەكشىسى ءارى باس ديريجەرى الەكساندر گالسانوۆتىڭ اتاپ وتكەنىندەي ونەرپازدار تۇرعىنداردى تاڭ قالدىرۋ ءۇشىن وسى كەشكە ۇزاق ۋاقىت بويى ازىرلەنگەن.
– بۇل وتە جاۋاپتى شارا، 80 ادامنان تۇراتىن ەكى وركەستردىڭ دومبىرانىڭ قوس ىشەگىندەي ۇندەسىپ، ونەر كورسەتۋى ءۇشىن كوپ تەر توكتىك. ءبىزدىڭ ورىنداۋىمىزداعى تۋىندىلار تىڭدارمان جۇرەگىنەن ورىن الدى دەپ سەنەمىن. فەستيۆال ەكىنشى جىل وتۋدە، قازاقستان ءۇشىن ونىڭ ماڭىزى ەرەكشە. سەبەبى دومبىرا دەگەنىمىز قازاقتىڭ جانى. دومبىرا ءبىزدىڭ وركەستردىڭ نەگىزگى اسپابى، - دەيدى ول.
ساحنادا سيمفونيالىق جانە بايجىگىت اتىنداعى قازاق حالىق اسپاپتار اتىنداعى وركەسترىنان بولەك ەسترادا جۇلدىزدارى ونەر كورسەتتى.
بەلگىلى ءانشى ەركىن شۇكىماننىڭ ورىنداۋىندا "ءان دومبىرا"، «دومبىرا ساعان وكپەم جوق»، «ساعىندىم التاي» اندەرى شىرقالسا، ايبەك بەكبوسىنوۆ ەلباسىعا ارنالعان كۇي ورىندادى، ونىڭ ورىنداۋىنداعى قۇرمانعازىنىڭ "سارىارقاسى" جانە "كوكتەمنىڭ ون جەتى ءساتى" تۋىندىلارى كوپتىڭ كوڭىلىنەن شىقتى.
– دومبىرا قازاقتىڭ كيەلى مۇراسى. كۇيشىلەر قادىم زاماننان بەرى ءقادىرىن جوعالتقان جوق. دومبىرانىڭ قوڭىر ءۇنى ارقىلى قازاقتىڭ مادەني مۇراسى مەن ءداستۇرىن دارىپتەيمىز. ەشبىر مۋزىكالىق اسپاپ سايىن دالانىڭ داۋسىن ءدال دومبىراداي جەتكىزە المايدى. وسىناۋ ءداستۇردىڭ ساباقتاسىپ، ۇرپاق-ۇرپاققا جەتكەنىن قالايمىن، – دەدى ايبەك بەكبوسىنوۆ.
كەشكە كەلگەن كورەرمەندەر اۋەزدى ان-كۇيگە بولەنىپ قانا قويماي، دومبىرا تۋرالى تانىمىن كەڭەيتەتىن سۇراق-جاۋاپ سايىسىنا دا قاتىستى.
كەشتىڭ سوڭىندا «An. Sal. Dar» توبى حالىق اندەرىن ورىنداپ، وعان كورەرمەندەر دە قوسىلىپ مەرەكەلىك شارانىڭ شىمىلدىعى ءتۇرىلدى.
