دارىندى بالالارعا ساپالى ءبىلىم بەرۋگە مىندەتتى مەكتەپتەردىڭ وزدەرى تومەن ءبىلىم دەڭگەيىن كورسەتىپ، تۇلەكتەرىنىڭ شەكارا اسىپ، شەت ەلدەرگە وقۋعا كەتىپ، وزگە ەلدىڭ ەكونوميكاسىنا ەڭبەك ەتۋى ءوڭىر باسشىلىعىن قاتتى قاپالاندىرسا كەرەك.

بيىل وسىنداي بەتالىسقا كوڭىل اۋدارعان وبلىس اكىمى دانيال احمەتوۆ مامانداندىرىلعان مەكتەپتەردىڭ جۇمىس ساپاسىنا ساراپتاما جاساپ، مۇنداي جوعارى اتاققا ساي ەمەستەرىنىڭ سانىن قىسقارتۋدى تاپسىرعان بولاتىن. وسى رەتتە ايماق باسشىسىنىڭ ورىنباسارى جاقسىلىق ومار باستاعان ماماندار توبى جۇمىس ىستەپ، وبلىستاعى 45 گيمنازيا مەن ليسەيدىڭ سوڭعى ءۇش جىلداعى قىزمەتىن مايشاممەن قاراپ شىققان ەدى.

جۇرگىزىلگەن جۇمىستىڭ ناتيجەسىندە 7 مەكتەپتە سوڭعى ءۇش جىلدا ءبىر دە ءبىر وقۋشى رەسپۋبليكالىق جانە حالىقارالىق ءبىلىم سايىستارىنان جۇلدەلى ورىنعا ىلىنبەگەندىگى انىقتالدى. ال 8 مەكتەپتە 2012 جىلدان بەرى ءبىر دە ءبىر بالا ۇزدىك اتتەستات پەن «التىن بەلگى» يەگەرى اتانباعان.

13 وقۋ ورداسىنىڭ ۇلتتىق ءبىرىڭعاي تەستىلەۋدىڭ قورىتىندىسى بويىنشا كورسەتكىشتەرى وبلىستىق ورتاشا كورسەتكىشتەن تومەن ەكەندىگى بەلگىلى بولدى. سوراقىسى سول، مۇنداي مامانداندىرىلعان مەكتەپتەردىڭ كوپتەگەن تۇلەكتەرى ۇبت تاپسىرۋدان باس تارتىپ، شەت ەلگە وقۋعا تايىپ تۇرادى ەكەن. ول از دەگەندەي، كوپشىلىگى سول جاقتا جۇمىسقا قالىپ، وزگە ەلدىڭ ەكونوميكاسىنا جۇمىس ىستەۋدە.

مۇنداي جۇمىس ءتاسىلىن ادەتكە اينالدىرعان مەكتەپ باسشىلارىن ءبىلىم باسقارماسىنىڭ القا جيىنىندا ءسوز العان وبلىس اكىمىنىڭ ورىنباسارى جاقسىلىق ومار سىنعا الدى.

– سىزدەر وقۋشىلاردى وزگە مەملەكەتتەردىڭ ەكونوميكاسىنا دايىندايسىزدار ما؟ الدە سىزدەر ءبىزدىڭ وقۋشىلاردىڭ قازاقستاننان تىس ءبىلىم الۋىنا قىزىعۋشىلىق تانىتاسىزدار ما؟ بۇل ساياسي ماسەلە، ولاردىڭ ءبىلىم الۋىنا مەملەكەتتىڭ قاراجاتىن جۇمسايمىز، ال ولار ءبىلىم الۋدى ەلىمىزدەن تىس جەردە جالعاستىرادى. ياعني، مەكتەپ ديرەكتورلارى، وقىتۋشىلار دۇرىس جۇمىس جۇرگىزبەيدى دەگەن ءسوز. بۇل، سونىمەن قاتار، ۇلتتىق قاۋىپسىزدىك ماسەلەسى. ءبىز ولارعا باستاپقى ءبىلىم بەرىپ، كىتاپتارمەن جانە  جىلى مەكتەپپەن قامتاماسىز ەتەمىز. ال ولار «ساۋ بول، قازاقستان» دەپ، شەتەلدە ءوز بىلىمدەرىن جالعاستىرۋدى ءجون دەپ سانايدى. ولاردىڭ ىشىندە باسىم بولىگى وقۋ وزاتتارى مەن وقۋ ۇزدىكتەرى. بۇعان الدىمەن سىزدەر، مەكتەپ باسشىلارى، جاۋاپتىسىزدار. مىنا جەردە تۇرىپ ۇيالۋدىڭ قاجەتى جوق، جۇمىس ىستەۋ كەرەك. وقۋشىلارمەن، اتا-انالارمەن بەلسەندى جۇمىس جۇرگىزۋ قاجەت. اتا-انالاردى شاقىرىپ، بالانىڭ ءبىلىمى تۋرالى ناقتى تالقىلاۋ اڭگىمەلەر جۇرگىزۋ شارت. ءبىزدىڭ وسكەمەندىك جوعارى وقۋ ورىندارى ءنوۆوسىبىر مەن تومسك ۋنيۆەرسيەتتەرىنەن 10 ەسە ارتىق ءبىلىم بەرەدى. ال سىزدەر مەملەكەت بولاشاعىن ويلامايدى ەكەنسىزدەر، وندا ورىندارىڭىزدى بوساتىڭىزدار، - دەپ جاقسىلىق ومار ويىن تۇيگەن بولاتىن.

ارنايى توپتىڭ ساراپتاماسىنىڭ ناتيجەسىندە وڭىردەگى 9 ماماندانىرىلعان مەكتەپتى اتاقتارىنان ايىرىپ، ءبىلىم ساپاسى جوعارى باسقا 4 مەكتەپتى گيمنازيالار ساناتىنا قوسۋ ۇسىنىلدى.

«سەن تيمەسەڭ، مەن تيمە...» دەپ اقىرىن-اياڭ ءجۇرىپ جاتقان ۇستازدار مەن مەكتەپ باسشىلارىنا مۇنداي سىلكىنۋلەردىڭ قاجەت ەكەنى ءسوزسىز.

جارقىن ءۇنعاتار