Shyǵys Qazaqstanda gimnaziialar men litseiler sany qysqarmaq
Biyl osyndai betalysqa kóńil aýdarǵan oblys ákimi Danial Ahmetov mamandandyrylǵan mektepterdiń jumys sapasyna saraptama jasap, mundai joǵary ataqqa sai emesteriniń sanyn qysqartýdy tapsyrǵan bolatyn. Osy rette aimaq basshysynyń orynbasary Jaqsylyq Omar bastaǵan mamandar toby jumys istep, oblystaǵy 45 gimnaziia men litseidiń sońǵy úsh jyldaǵy qyzmetin maishammen qarap shyqqan edi.
Júrgizilgen jumystyń nátijesinde 7 mektepte sońǵy úsh jylda bir de bir oqýshy respýblikalyq jáne halyqaralyq bilim saiystarynan júldeli orynǵa ilinbegendigi anyqtaldy. Al 8 mektepte 2012 jyldan beri bir de bir bala úzdik attestat pen «Altyn belgi» iegeri atanbaǵan.
13 oqý ordasynyń Ulttyq biryńǵai testileýdiń qorytyndysy boiynsha kórsetkishteri oblystyq ortasha kórsetkishten tómen ekendigi belgili boldy. Soraqysy sol, mundai mamandandyrylǵan mektepterdiń kóptegen túlekteri UBT tapsyrýdan bas tartyp, shet elge oqýǵa taiyp turady eken. Ol az degendei, kópshiligi sol jaqta jumysqa qalyp, ózge eldiń ekonomikasyna jumys isteýde.
Mundai jumys tásilin ádetke ainaldyrǵan mektep basshylaryn bilim basqarmasynyń alqa jiynynda sóz alǵan oblys ákiminiń orynbasary Jaqsylyq Omar synǵa aldy.
– Sizder oqýshylardy ózge memleketterdiń ekonomikasyna daiyndaisyzdar ma? Álde sizder bizdiń oqýshylardyń Qazaqstannan tys bilim alýyna qyzyǵýshylyq tanytasyzdar ma? Bul saiasi másele, olardyń bilim alýyna memlekettiń qarajatyn jumsaimyz, al olar bilim alýdy elimizden tys jerde jalǵastyrady. Iaǵni, mektep direktorlary, oqytýshylar durys jumys júrgizbeidi degen sóz. Bul, sonymen qatar, ulttyq qaýipsizdik máselesi. Biz olarǵa bastapqy bilim berip, kitaptarmen jáne jyly mekteppen qamtamasyz etemiz. Al olar «Saý bol, Qazaqstan» dep, shetelde óz bilimderin jalǵastyrýdy jón dep sanaidy. Olardyń ishinde basym bóligi oqý ozattary men oqý úzdikteri. Buǵan aldymen sizder, mektep basshylary, jaýaptysyzdar. Myna jerde turyp uialýdyń qajeti joq, jumys isteý kerek. Oqýshylarmen, ata-analarmen belsendi jumys júrgizý qajet. Ata-analardy shaqyryp, balanyń bilimi týraly naqty talqylaý áńgimeler júrgizý shart. Bizdiń óskemendik joǵary oqý oryndary Novosibir men Tomsk ýniversietterinen 10 ese artyq bilim beredi. Al sizder memleket bolashaǵyn oilamaidy ekensizder, onda oryndaryńyzdy bosatyńyzdar, - dep Jaqsylyq Omar oiyn túigen bolatyn.
Arnaiy toptyń saraptamasynyń nátijesinde óńirdegi 9 mamandanyrylǵan mektepti ataqtarynan aiyryp, bilim sapasy joǵary basqa 4 mektepti gimnaziialar sanatyna qosý usynyldy.
«Sen timeseń, men time...» dep aqyryn-aiań júrip jatqan ustazdar men mektep basshylaryna mundai silkinýlerdiń qajet ekeni sózsiz.
Jarqyn ÚNǴATAR
