مەكتەپتەردەگى 9 جانە 11 سىنىپتارعا ارنالعان مەملەكەتتىك ەمتيحاندار 2-19 ماۋسىم ارالىعىندا ءبىلىم مينيسترلىگىنىڭ №125 بۇيرىعىنا سايكەس ءداستۇرلى فورماتتا وتەدى. قازىرگى ۋاقىتتا ەمتيحان تاپسىرمالارى ازىرلەنۋدە. «التىن بەلگىگە» ۇمىتكەرلەر قۇجاتتارىنىڭ تالاپتارعا سايكەستىگى ارنايى كوميسسيامەن تەكسەرىلدى.
دەنساۋلىق جاعدايى جانە باسقا دا سەبەپتەر بويىنشا ەمتيحانداردان بوساتىلعان وقۋشىلاردىڭ تىزىمىدە دايىندالۋدا.
وبلىستا 8800-گە جۋىق 9-سىنىپ تۇلەكتەرى بولسا، ونىڭ 789-ى ەرەكشە ۇلگىدەگى اتتەستاتقا ۇمىتكەر. ال، 11-سىنىپتى 3810 تۇلەك اياقتاماق، ونىڭ ىشىندە، 281 وقۋشى «التىن بەلگىگە»، 378 «ۇزدىك اتتەستاتقا» ۇمىتكەر، - دەدى شقو ءبىلىم باسقارماسىنىڭ مەكتەپكە دەيىنگى جالپى ورتا ءبىلىم بەرۋ ءبولىمىنىڭ باسشىسى بۇلبۇل قوزىبايەۆا. سونىمەن قاتار وڭىردە مەكتەپكە دەيىنگى تاربيە جۇيەسىندە 203 بالاباقشا مەن 190 شاعىن ورتالىق جۇمىس ىستەۋدە. جازعى كەزەڭدە كەزەكشى توپتاردىڭ جۇمىسى ۇيىمداستىرىلاتىن بولادى.
ونىڭ ىشىندە ماۋسىم ايىندا 169 بالاباقشادا 17829 بالاعا 677 توپ، شىلدەدە 122 بالاباقشادا 12944 بالاعا 477 توپ، تامىزدا 114 بالاباقشادا 12321 بالاعا 466 توپ جۇمىس ىستەمەك.
«جازعى دەمالىسپەن جانە ساۋىقتىرۋمەن 92 434، ونىڭ ىشىندە كوپ بالالى جانە از قامتىلعان وتباسىلاردان شىققان بالالاردىڭ 100% قامتۋ جوسپارلانۋدا. وبلىستا اعىمداعى جىلى 418 لاگەر جۇمىس ىستەمەك. جازعى ساۋىقتىرۋ لاگەرلەرىنە قابىلداۋ 2023 جىلدىڭ 24 ساۋىرىنەن باستالدى»،- دەپ اتاپ ءوتتى دينارا شاۋحينا.
شىعىس قازاقستان وبلىسىندا 1 ساۋىردەن باستاپ بالالاردى 1-سىنىپقا قابىلداۋ ءۇشىن تىركەۋ باستالدى. 1 تامىزعا دەيىن جالعاسپاق.
3 مەكتەپتى كۇردەلى جوندەۋ جانە 23 ۇيىمدى اعىمداعى جوندەۋ جوسپارلانعان. وسى ماقساتتارعا 1،1 ملرد. تەڭگە قاراستىرىلعان. كونكۋرستىق راسىمدەر اياقتالدى. جوندەۋ جۇمىستارى جاڭا وقۋ جىلى باستالعانعا دەيىن دەمالىس ۋاقىتىندا جۇرگىزىلەدى.
تەحنيكالىق جانە كاسىپتىك ءبىلىم بەرۋ جۇيەسىندە 41 كوللەدج جۇمىس ىستەيدى، وندا 17727 ستۋدەنت وقيدى. اعىمداعى جىلى 101 ماماندىق بويىنشا 4455 ادام تۇلەك اتانباق»،- دەدى شقو ءبىلىم باسقارماسى باسشىسىنىڭ ورىنباسارى دينارا شاۋحينا.
سونىمەن قاتار ءبىلىم باسقارماسى وقۋشىلاردىڭ زياتكەرلىك جانە شىعارماشىلىق قابىلەتتەرىن انىقتاۋ جانە ىسكە اسىرۋ بويىنشا ارنايى جۇمىستار جۇرگىزۋدە. اعىمداعى وقۋ جىلىندا وقۋشىلار 51 مەدال جەڭىپ الدى، ونىڭ ىشىندە 1 گران-پري، 13 التىن، 36 كۇمىس جانە 31 قولا. وبلىس قۇراماسى 2-7 سىنىپ وقۋشىلارىنا ارنالعان «زەردە» رەسپۋبليكالىق زەرتتەۋ جۇمىستارى مەن شىعارماشىلىق جوبالار بايقاۋىندا I جالپىكوماندالىق ورىنعا يە بولدى. «ۇزدىك وليمپيادالىق كوماندا» نوميناسياسى بويىنشا ديپلوممەن ماراپاتتالدى. جالپى ءبىلىم بەرەتىن پاندەر بويىنشا رەسپۋبليكالىق وليمپيادادا وبلىس «ۇزدىك وليمپيادالىق كوماندا» نوميناسياسى بويىنشا جالپى كوماندالىق ەكىنشى ورىنعا يە بولدى.
