وبلىس ينۆەستيسيا تارتۋ بويىنشا رەسپۋبليكادا كوش باسىندا كەلەدى. ماسەلەن، وتكەن جىلى 482 ملرد. تەڭگە قارجى قۇيىلدى. ەندى تاعى 4،8 ملرد. اقش دوللارىن قۇرايتىن 26 جوبانى جۇزەگە اسىرۋ جوسپاردا بار. ءقازىردىڭ وزىندە ونىڭ 12ء-سى ىسكە اسىرىلۋدا. بۇل تۋرالى بۇگىن «كونە تۇركىستان – جاڭا مۇمكىندىكتەر» اتتى حالىقارالىق ينۆەستيسيالىق جانە تۋريستىك فورۋمدا وبلىس اكىمى جانسەيىت تۇيمەبايەۆ مالىمدەدى.
جيىنعا رەسەي، يران، مالايزيا، تۇركيا، قحر، چەحيا، يتاليا، ءباا، پولشا سىندى ەلدەردەن كەلگەن كاسىپكەرلەر قاتىستى. ايماق باسشىسى قوناقتاردى ايتۋلى كۇنمەن قۇتتىقتاپ، وبلىستىڭ ەكونوميكالىق الەۋەتىمەن تانىستىردى.
– تۇركىستان – تالاي جىلدار بويى قازاق حاندىعىنىڭ جانە تۇركى الەمىنىڭ ساياسي ورداسى، رۋحاني استاناسى بولعان شاحار. ەلباسىمىز وسىناۋ كونە قالانى وبلىس ورتالىعى ەتىپ، ونى دامىتۋعا ەرەكشە ىقىلاس تانىتىپ وتىرعانى بەلگىلى. بۇگىندە مەملەكەت تاراپىنان جالپى قۇنى 2 ملرد. اقش دوللارىن قۇرايتىن ينۆەستيسيا قۇيۋ جوسپارلانىپ وتىر. ياعني، مۇندا اۋەجاي، اكىمشىلىك - ىسكەرلىك ورتالىعى جانە تۇرعىن ۇيلەر بوي كوتەرىپ، تۇركىستان زاماناۋي ۇلگىدەگى تەحنولوگيا ەنگىزىلگەن اقىلدى قالاعا اينالاتىنى ءسوزسىز. ءقازىردىڭ وزىندە ءوڭىردىڭ ەكونوميكالىق دامۋ مۇمكىندىگىنە قانىققان وتاندىق جانە تۇرىك كومپانيالارى 100 ملن. اقش دوللارىنان اساتىن قارجى سالىپ، 5 جۇلدىزدى قوناق ۇيلەر، ويىن-ساۋىق ساۋدا ورىندارى مەن فيتنەس ورتالىقتار اشۋدى كوزدەپ وتىر. بۇگىنگى جيىن وزدەرڭىزبەن وسىنداي ىسكەرلىك قارىم-قاتىناس ورناتىپ، نىعايتۋعا سەپ بولادى دەگەن سەنىمدەمىن، – دەدى جانسەيىت قانسەيىت ۇلى.
سونىمەن قاتار، ءوڭىردى دامىتۋعا باعىتتالعان كەز-كەلگەن جوبانى بارلىق تاراپتان قولداۋعا دايىن ەكەنىن ايتقان وبلىس اكىمى، ايماقتى ءۇش باعىتتا دامىتۋعا باسىمدىق بەرىلگەنىن دە جەتكىزدى.
فورۋمدا ەۋرازيالىق ەكونوميكالىق ىنتىماقتاستىق ۇيىمىنىڭ باس حاتشىسى ۆلاديمير پيسكۋريەۆ تۇركىستاننىڭ تۋريزم سالاسىنداعى مۇمكىندىگىن جوعارى باعالاسا، «DALHolding» كومپانياسىنىڭ باسشىسى دەميردجان كوسە تۇركىستان وبلىسىندا 200 گەكتار جىلىجاي مەن سەمەنت زاۋىتىن اشۋعا دايىن ەكەنىن مالىمدەدى. ال، مالايزيانىڭ «Nagasteel Equipment Sdn. Bhd.» كومپانياسىنىڭ پرەزيدەنتى زاينۋل ازيزان ينفراقۇرىلىم جانە ونەركاسىپ سالالارىنا ينۆەستيسيا قۇيۋعا ءازىر ەكەنىن ايتتى. سونداي-اق «RIXOS HOTELS» قوناق ۇيلەر جەلىسىنىڭ پرەزيدەنتى فەتاح تاميندجي، ەۋرازيالىق تۋريزم اسسوسياسياسىنىڭ پرەزيدەنتى رىستى قارابايەۆا، «قازاق تۋريزم» ۇلتتىق كومپانياسىنىڭ باسقارما ءتوراعاسى راشيد كۇزەمبايەۆ جانە وزگە دە سپيكەرلەر بايانداما جاساپ، كەلەشەكتە تۇركىستاندى تۋريزم كوشباسشىسىنا اينالدىرۋ باعىتىنداعى ويلارىن ورتاعا سالدى.
فورۋم اياسىندا ۆ2ۆ فورماتىنداعى كەزدەسۋلەر ءوتتى. سونىمەن بىرگە «تۋريزم يندۋسترياسى — قازاقستان ەكونوميكاسىنىڭ جاڭا درايۆەرى»، «سولتۇستىك-وڭتۇستىك ەكونوميكالىق ءدالىزى» تاقىرىپتارىندا جانە اگروونەركاسىپ كەشەنىن دامىتۋداعى ادام كاپيتالىنىڭ ءرولى جونىندە پىكىرالماسۋلار ءوتىپ جاتىر.
ەرەكشە تاريحي-ارحيتەكتۋرالىق جانە ارحەولوگيالىق ەسكەرتكىشتەرى، ايرىقشا تابيعاتى بار ءوڭىردىڭ ءبىرىنشى دامۋ باعىتى – تۋريزم. ءقازىردىڭ وزىندە مۇندا مۇندا كەلەتىن تۋريستەر سانى جىل ساناپ ارتىپ كەلەدى. ماسەلەن، وتكەن جىلى وبلىسقا 270 مىڭنان استام ساياحاتشى كەلگەن. بۇل 2016 جىلمەن سالىستىرعاندا 40 پايىزعا ارتىق. ينۆەستيسيا تارتۋعا قولايلى ەكىنشى باعىت اۋىل شارۋاشىلىعىن سالاسى. اۋا رايى جايلى وبلىستىڭ اۋىل شارۋاشىلىق سالاسى داۋى جاعىنان رەسپۋبليكادا ءبىرىنشى ورىنعا شىققان. سونداي-اق، لوگيستيكالىق جانە ترانزيتتىك الەۋەتتى كوتەرۋ جۇمىس كەستەدە تۇرعان ءۇشىنشى ماسەلە.
وبلىستىڭ ەكونوميكالىق جانە ينۆەستيسيالىق الەۋەتىنە قانىققان شەتەلدىك قوناقتار تۇركىستان وڭىرىندە تۋريزم، اۋىل شارۋاشىلىعى، كاسىپكەرلىك سالالارىن دامىتۋعا اتسالىسۋعا نيەتتى ەكەندىكتەرىن ءبىلدىردى. سونداي-اق، يران، مالايزيا، جۇڭگو ەلدەرىنەن كەلگەن ينۆەستورلار ايماقتا زاماناۋي ۇلگىدەگى الەۋمەتتىك نىساندار سالىپ، ينراقۇرىلىم مەن ساندىق تەحنولوگيانى دامىتۋعا كۇش سالاتىنىن دا اتاپ ءوتتى.
تۇركىستان وبلىسى اكىمىنىڭ باسپا ءسوز قىزمەتى
