قازاقستاندا تمد ەلدەرىنەن تىس مەملەكەتتەردە تۇراتىن اتا-انالاردان اليمەنت ءوندىرۋ ماسەلەسى ءالى دە كۇردەلى بولىپ وتىر. مالىمەتكە سايكەس، مۇنداي جاعدايدا سوت شەشىمدەرىنىڭ ورىندالۋ دەڭگەيى نەبارى 16 پايىزدى عانا قۇرايدى، دەپ حابارلايدى Dalanews.kz.
سوت اكىمشىلىگى باسشىسىنىڭ ورىنباسارى اسىلبەك مۇسرالينوۆ بۇل كورسەتكىشتىڭ تومەن بولۋىن بىرنەشە سەبەپپەن ءتۇسىندىردى. ونىڭ ايتۋىنشا، ءار مەملەكەتتىڭ زاڭناماسى ءارتۇرلى بولعاندىقتان جانە اليمەنت تولەۋگە مىندەتتى ادامداردىڭ ناقتى قاي جەردە جۇرگەنىن انىقتاۋ قيىن بولعاندىقتان، سوت شەشىمدەرىن ورىنداۋ كۇردەلەنە تۇسەدى.
ال تمد ەلدەرى اراسىندا بۇل ماسەلە ءبىرشاما وڭ شەشىمىن تاۋىپ كەلەدى. مينسك جانە كيشينيەۆ كونۆەنسيالارىنىڭ اياسىندا اليمەنت وندىرۋگە قاتىستى جولدانعان وتىنىشتەردىڭ شامامەن 90 پايىزى ورىندالادى.
وسىعان بايلانىستى ءماجىلىس اتالعان حالىقارالىق كەلىسىمدەرگە ەنگىزىلگەن وزگەرىستەردى راتيفيكاسيالادى. جاڭا تۇزەتۋلەرگە سايكەس، اليمەنت ءوندىرۋ تۋرالى سوت بۇيرىقتارى تمد-عا مۇشە مەملەكەتتەردىڭ اۋماعىندا ءوزارا تانىلىپ، ءماجبۇرلى تۇردە ورىندالۋى ءتيىس. بۇل شارا بالالاردىڭ قۇقىعىن قورعاۋدى كۇشەيتىپ، اليمەنت ءوندىرۋ تەتىگىن تيىمدىرەك ەتۋگە باعىتتالعان.
