پروكۋراتۋرا ورگاندارىنىڭ ارداگەرى حاتيشا جۇماعۇلوۆا شەرزات ولىمىنە بايلانىستى سوت پروسەسىنە قاتىستى پىكىر ءبىلدىردى، دەپ حابارلايدى Dalanews.kz Tengrinews.kz-كە سىلتەمە جاساپ.
سيفرلىق داۋىردە الەۋمەتتىك جەلىلەر مەن بلوگەرلەر ارقىلى قوعام پىكىرىنىڭ ىقپالى ايتارلىقتاي ارتتى. الايدا زاڭ تۇرعىسىنان العاندا، سوتقا، كۋالارعا، جابىرلەنۋشىلەر مەن ايىپتالۋشىلارعا قىسىم جاساۋ ارەكەتتەرىنە جول بەرىلمەۋى ءتيىس. اسىرەسە رەزونانستى ىستەردە بۇل پروكۋرورلار مەن سۋديالارعا مورالدىق قىسىم تۋدىرىپ، ءادىل ۇكىمگە كەدەرگى كەلتىرۋى مۇمكىن.
حاتيشا جۇماعۇلوۆانىڭ سوزىنشە، ازاماتتىق قوعام سوت جۇيەسىن باقىلاپ وتىرۋى كەرەك، ءبىراق بۇل ارەكەتتەر قۇقىقتىق شەڭبەردە جۇزەگە اسۋى ءتيىس ەكەنىن ەسكەرتتى.
– بلوگەرلەر ەكىنشى تەرگەۋ نەمەسە سوتتىڭ ءرولىن اتقارماۋى قاجەت. ەگەر بلوگەر قانداي دا ءبىر ادامدى ايعاقسىز ايىپتاپ، ۆيدەولار نە جازبالار جاريالاسا، بۇل ادىلەتتىلىككە كەدەرگى كەلتىرۋى مۇمكىن. قىلمىستىق ءىس – توك-شوۋ ەمەس. ءسوز بوستاندىعى – جالا جابۋ نەمەسە سوت ىسىنە ارالاسۋ جاۋاپكەرشىلىگىن جوققا شىعارمايدى، – دەدى جۇماعۇلوۆا.
ول قوعامدى قورىتىندى جاساۋعا اسىقپاۋعا جانە سوتتى قۇرمەتتەۋگە شاقىردى.
– ەڭ باستىسى — داۋىس كوتەرۋ ەمەس، دالەل. سوندا عانا ءادىل ءارى زاڭدى شەشىمگە قول جەتكىزەمىز. زاڭ – بۇل ەموسيا ەمەس، ادىلەتتىڭ قۇرالى. سوتقا ءىستى تولىققاندى قاراپ، ءادىل ۇكىم شىعارۋعا مۇمكىندىك بەرىڭىزدەر، – دەدى ول.
ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.
كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.
كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى.
ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعانان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.
