مارقۇم شەرزات پولاتتىڭ وتباسى تالعار ماڭىنان ٶلٸ تابىلعان تۋىسى نۇرقانات عايىپباەۆتىڭ "ٶزٸنە ٶزٸ قول سالعانىنا" سەنبەيدٸ. مارقۇم شەرزاتتىڭ ەكەسٸ قارجاۋباي نۇرىموۆ ازاتتىق تٸلشٸسٸنە ٸنٸسٸن قالاي تاپقانىن ايتىپ بەرگەن, دەپ حابارلايدى Dalanews.kz.
قارجاۋباي نۇرىموۆتىڭ ايتۋىنشا, وسىدان كەيٸن ولار بەس ادام بولىپ عايىپباەۆتى ٸزدەۋگە شىققان. الدىمەن تالعارداعى زيرات اۋماعى الدىنان مارقۇم مٸنٸپ كەتكەن كٶلٸكتٸ تاپقان. "ەسٸگٸ اشىق بولدى, ٸشٸندە ۇيالى تەلەفونى جاتتى" دەدٸ قارجاۋباي نۇرىموۆ. ونىڭ سٶزٸنە قاراعاندا, زيرات الدىندا جار بار, ٸنٸسٸ سول جەردەن تٶمەن تٷسكەنٸن جەردەگٸ ٸزدەن انىقتاعان.
– بٸز تٷندە كەلگەندە قار جاۋىپ تۇرعان, جاردان تٷسٸپ, 500-700 مەتر جەردە جول بويىنداعى قۋىسقا بارىپ, تالدىڭ جيەگٸنە وتىرىپ, ٶلٸپ قالعان. موينىندا سىم تۇرعان. قۇزىرلى ورگاندارعا كەشە بەرٸن تٷسٸندٸردٸم. ەكٸ ساعاتتان ارتىق جان-جاقتى ٸزدەدٸك. مىنا جاردىڭ بيٸكتٸگٸ – 7-8 مەتر, وسىدان سىرعىپ تٷسكەن. باۋىرىمنىڭ ٶلەمٸن دەگەن نيەتٸ بولعان ەمەس. قانداي شىندىقتى ايتىپ جاتساق دا, بٸزدٸ قارالاپ جاتقان ادامدار بار. سول ٷشٸن ارتىق ەشتەڭە ايتقىم كەلمەيدٸ, – دەدٸ قارجاۋباي نۇرىموۆ.
بيىل 4 قازانعا قاراعان تٷنٸ الماتى وبلىسى تالعار اۋدانىندا بٸر توپ ادام قاتىسقان جانجال كەزٸندە 16 جاستاعى شەرزات پولات پىشاققا تٷسٸپ مەرت بولعان ەدٸ. وقيعادان سوڭ قارا جامىلعان وتباسىنىڭ ٷيٸ ٶرتەنٸپ, پوليتسييا اۋداندا كٷزەتتٸ كٷشەيتكەن. نۇرىموۆ "ەدٸل سوت بولادى دەپ كٷتٸپ جٷردٸك" دەدٸ.
– ساراپتاما "ٶزٸنە قول جۇمسادى" دەيدٸ. ونى قوسىمشا تالداۋعا زەرتتەۋگە جٸبەرەمٸن. قانداي جاعداي بولسا دا بٸز ەشكٸمدٸ ٶلتٸرگەن جوقپىز, – دەدٸ نۇرىموۆ.
تالعارداعى زيراتتا شەرزات پولاتتىڭ بەيٸتٸنٸڭ قاسىنان تاعى بٸر قابٸر قازىلىپ جاتىر.
ەسكە سالايىق, بٷگٸن الماتى وبلىسىندا شەرزات بولاتتىڭ اعاسى نۇرقانات عايىپباەۆ ٶلٸ تابىلعان ەدٸ. پوليتسييا دەپارتامەنتٸنٸڭ الدىن الا دەرەكتەرٸ بويىنشا, ول سۋيتسيد جاساعان. وعان دەلەل رەتٸندە پوليتسەيلەر نۇرقاناتتىڭ تۋىسىنا مەسسەندجەر ارقىلى جازعان حاتىن جارييا ەتتٸ.
حابارلامادا ول تۋىسقاندارىمەن قوشتاسىپ, جيەنٸنٸڭ جانىنا جەرلەۋدٸ سۇراعان.
بۇل فاكتٸ بويىنشا قىلمىستىق ٸس قوزعالدى. قازٸرگٸ ۋاقىتتا بارلىق جاعدايلاردى انىقتاۋ ٷشٸن تەرگەۋ امالدارى جٷرگٸزٸلٸپ جاتىر.
شەرزات بولات تاراپىنىڭ ادۆوكاتى سايدا تەۋەكەلوۆا جاسٶسپٸرٸمنٸڭ اعاسىنىڭ ٶلٸ تابىلۋىنا قاتىستى مەلٸمدەمە جاساعان بولاتىن.
سايدا تەۋەكەلوۆا مارقۇمنىڭ اعاسى نۇرقانات عايىپباەۆ كٶز جۇمعانىن راستادى. "چەمودان گوسسەكرەتوۆ" تەلەگرام-ارناسىندا “شەرزات بولاتتىڭ اعاسى تٶبەلەس كەزٸندە قارۋدى بٸرٸنشٸ الىپ شىققان, سول ٷشٸن ٶزٸن ايىپتى سەزٸنٸپ, ٶز-ٶزٸنە قول سالعان” دەگەن اقپارات تاراعان.
"مارقۇمنىڭ تەرگەۋ بارىسىندا بەرگەن جاۋاپتارىنان ونىڭ قاتتى قوبالجىعانىن, ٸنٸسٸنٸڭ ٶلٸمٸنە ٶزٸن كٸنەلٸ دەپ ساناعانىن بايقاۋعا بولادى. سۋيتسيد جاساۋىنىڭ دا سەبەبٸ سول بولۋى مٷمكٸن", دەلٸنگەن تەلەگرامداعى جازبادا.
ادۆوكات تەۋەكەلوۆا بۇل نۇسقانى جوققا شىعارعان ەدٸ.
ال بۇعان دەيٸن شەرزات بولات تاراپىنىڭ قورعاۋشىسى مارال جايلاۋباەۆا قاندى وقيعا بولعان تٷنٸ كٷدٸكتٸلەر مارقۇم شەرزاتتىڭ اعاسى نۇرقاناتتى دا ٶلتٸرۋگە وقتالعانىن ايتقان ەدٸ.
“بٸز نۇرقاناتتى ٶلتٸرۋگە وقتالۋ فاكتٸسٸ بويىنشا تەرگەۋ ورگاندارىنا ٶتٸنٸش جٸبەردٸك. كٷدٸكتٸلەر نۇرقاناتقا دەنە جاراقاتتارىن كەلتٸرٸپ, 3-4 مەرتە جامباسى مەن تٶسٸنە پىشاق سۇققان. اتالعان ەرەكەتتەر ادامدى ٶمٸرٸنەن ايىرۋعا تٸكەلەي باعىتتالعان, ياعني ناقتى نيەتپەن جاسالعان دەپ ەسەپتەيمٸز. بۇل ٶتٸنٸش قازٸر تەرگەۋ ورگاندارىمەن قارالۋدا. قىلمىستىق ٸس بويىنشا جەبٸرلەنۋشٸلەر مەن كٷدٸكتٸلەردٸڭ ورتاسىندا بەتتەستٸرۋ ٶتكٸزٸلٸپ, قازٸرگٸ تاڭدا تاعايىندالعان ساراپتامالاردىڭ قورىتىندىلارىمەن بٸز تانىسۋدامىز”, - دەگەن ەدٸ ادۆوكات.
