ىشكى ىستەر مينيسترلىگى تالعاردا شەرزات بولاتتىڭ ءىسى بويىنشا ايىپتالىپ وتىرعان كۇدىكتىلەردىڭ ۆيدەوسىنان كەيىن تەكسەرۋ جۇرگىزدى. ولار ۋاقىتشا ۇستاۋ يزولياتورىندا تۋعان كۇن تويلاپ، جۇرتتىڭ اشۋىن تۋعىزعان ەدى. تەكسەرۋ ناتيجەسىندە بىرنەشە قىزمەتكەر جۇمىسىنان بوساتىلدى، دەپ حابارلايدى Dalanews.kz.
رەسمي دەرەككە سۇيەنسەك، بەينەجازبانى بۇرىنعى يزولياتور قىزمەتكەرى جەكە تەلەفونىنا تۇسىرگەن كورىنەدى. ول قىزمەتتىك ءتارتىپتى ورەسكەل بۇزعانى ءۇشىن جۇمىسىنان بوساتىلىپ، ارنايى اتاعىنان ايىرىلدى. سونىمەن قاتار بۇل وقيعاعا بايلانىستى قىلمىستىق ءىس قوزعالدى.
مينيسترلىكتىڭ مالىمەتىنشە، 16 قىزمەتكەر تارتىپتىك جاۋاپكەرشىلىككە تارتىلىپ، قىزمەتىنەن قۋىلدى. ولاردىڭ قاتارىندا يزولياتور باستىعى دا بار.
وسى وقيعادان كەيىن يزولياتورداعى قاۋىپسىزدىك تالاپتارى كۇشەيتىلىپ، قوسىمشا بەينەمونيتورينگ ەنگىزىلدى. ەلىمىزدەگى باسقا دا ۋاقىتشا ۇستاۋ يزولياتورلارىندا جوسپاردان تىس تەكسەرۋلەر باستالدى.
ايتا كەتەيىك، شەرزاتتىڭ ولىمىنە قاتىسى بار دەگەن كۇدىكتىلەردىڭ يزولياتوردا تۋعان كۇن تويلاعان ۆيدەوسى الەۋمەتتىك جەلىلەردە تاراپ كەتكەن ەدى.
بۇل جاعداي قوعامدا تاعى دا رەزونانس تۋعىزدى. ارتىنشا الماتى وبلىسىنىڭ پوليسيا دەپارتامەنتى ءمان-جايدى ءتۇسىندىردى.
"ۋاقىتشا ۇستاۋ يزولياتورىنان ءبىر تۇتقىننىڭ تۋعان كۇنىن اتاپ ءوتۋى بەينەلەنگەن ۆيدەونىڭ تارالۋ فاكتىسى بويىنشا جان-جاقتى تەكسەرۋ جۇرگىزىلۋدە. بارلىق كىنالى تۇلعالار، سونىڭ ىشىندە باسشىلىق تا، قاتاڭ جاۋاپكەرشىلىككە تارتىلادى. تەرگەۋ بارىسى ەرەكشە باقىلاۋعا الىندى. وسى قۇقىق بۇزۋشىلىققا ىقپال ەتكەن سەبەپتەر مەن جاعدايلاردى جويۋ بويىنشا شارالار قابىلداندى"، — دەپ مالىمدەدى پوليسيا.
كەيىن شەرزات بولاتتىڭ ءىسى بويىنشا كۇدىكتىلەردەن ۇيالى تەلەفون، اليسا قۇرىلعىسى تاركىلەنگەن. بۇل تۋرالى جابىرلەنۋشى تاراپتىڭ ادۆوكاتى مالىمدەدى.
ادۆوكاتتار قۇقىق قورعاۋ ورگاندارىنا سۇراۋ جىبەرگەن. جەلىدە تاراعان وقيعا ەڭبەكشىقازاق اۋدانىنداعى ۋاقىتشا ۇستاۋ يزولياتورىندا بولعان.
ادۆوكات ەرلان ادايەۆتىڭ سوزىنشە، بۇل جاعداي بويىنشا قۇزىرلى ورگانداردان تولىق اقپارات سۇراتقان.
"ەڭبەكشى قازاق اۋدانىنداعى لاۋازىمدى تۇلعالارعا قاتىستى قىزمەتتىك تەكسەرىس اياقتالدى. قورىتىندى الماتى وبلىسىسىڭ پوليسيا دەپارتامەنتىنە جىبەرىلدى. ىسكە قاتىستى لاۋازىمدى تۇلعالاردىڭ ءبارى دە انىقتالدى. ولار تارتىپتىك كوميسسيا شەشىمىمەن جازاعا تارتىلادى. تەرگەۋ يزولياتورىندا قولدانىلعان زاڭسىز زاتتاردىڭ ءبارى – ءموبيلدى تەلەفون، ياندەكس-كولونكا تاركىلەنىپ، قىزمەتتىك تەرگەۋ ماتەرتالدارىنا تىركەلدى. بەينەباقىلاۋ كامەرالارىنىڭ جازبالارى زەرتتەلدى"، – دەگەن ول.
ەسكە سالايىق، 2024 جىلى 4 قازاندا تالعاردا 16 جاستاعى ءجاسوسپىرىم شەرزات بولات قازا تاپتى. اراعا ءبىراز ۋاقىت سالىپ شەرزاتتىڭ اعۆسى نۇرقانات عايىپبايەۆ تا ءولى تابىلدى.
