شەرزات ءىسى بويىنشا سوت ۇكىمى قاشان شىعاتىنى بەلگىلى بولدى، دەپ حابارلايدى Dalanews.kz.
قىلمىستىق ءىس بويىنشا كۇدىكتىلەرگە سوت ۇكىمى 5 ماۋسىم- بەيسەنبى كۇنى كەشكە 16.00-دە شىعادى.
ەسكە سالايىق، بۇعان دەيىن كۇدىكتىلەردىڭ جارىسسوزدە نە ايتقانىن جازعان ەدىك.
سوت وتىرىسىندا العاشقى بولىپ سويلەگەن سوتتالۋشى دارحان اسكەنتاي وقيعا كەزىندە مارقۇم شەرزاتپەن توبەلەسىپ قالعانىن، سودان كەيىن دوستارىن كومەككە شاقىرعانىن ايتتى. ول بۇل ارەكەتىنە وكىنىش ءبىلدىرىپ، سول جەردە بولعانىن جانە تەلەفون شالعانىن راستادى. اسكەنتاي ءوز ارەكەتىن بەينەماتەريال ارقىلى باعالاۋعا بولاتىنىن، ەشكىمگە قول كوتەرمەگەنىن، تەپپەگەنىن جانە قولىندا پىشاق بولماعانىن مالىمدەدى. ول دوسى نۇربولدى شاقىرعانىنا وكىنىپ، توبەلەس بولاتىنىن بىلمەگەنىن جەتكىزدى. سونداي-اق، وقيعاعا سەبەپكەر بولعان قارجاۋباي تۋرالى جالعان اقپارات بەرىلگەنىن، بالالار كەلگەندە ول پىشاق شىعارىپ، اگرەسسيا تانىتپاعاندا جانە شەرزات ولاردى ۇرماعان جاعدايدا مۇنداي جاعداي ورىن الماس ەدى دەپ سانايتىنىن ايتتى. اسكەنتاي توبەلەستى باستاعان جانە پىشاق پەن قارۋ قولدانعان قارجاۋبايدىڭ قىلمىستىق كودەكستىڭ 293-بابىمەن سوتتالۋىن سۇرادى.
سوتتالۋشى راۆيل ساكييەۆ جابىرلەنۋشى تاراپتان جانە نۇرقاناتتىڭ اجەسىنەن شىن جۇرەكتەن كەشىرىم سۇرايتىنىن ايتتى. ول تەرگەۋ مەن سوت بارىسىندا نۇرقاناتتى ەكى-ۇش رەت تەپكەنىن مويىندادى جانە ىستەگەن ىسىنە وكىنەتىنىن جەتكىزدى. ساكييەۆ وزىنە قك 293-باپ، 24-باپ جانە 99-باپ بويىنشا ايىپ تاعىلعانىن ايتتى. ول نۇرقاناتتىڭ العاشقى جاۋاپتارىندا پىشاقتى باسقا ادامدار سالدى دەگەنىن، ال بەتتەستىرۋ كەزىندە ونى 2017 جىلدان بەرى تانيتىنىن مالىمدەگەنىن كەلتىردى. ءوزىنىڭ اتى تەرگەۋ كەزىندە اتالعانىن، ءبىراق بەتتەستىرۋگە دەيىن 22-23 كۇن بويى ايتىلماعانىن اتاپ ءوتتى.
ول قارجاۋبايدىڭ ءوز كىناسىن مويىنداعانىن جانە ول ءۇشىن العىس ايتاتىنىن ايتتى. ساكييەۆ تاعىلعان ايىپپەن كەلىسپەيتىنىن، تەك تەپكەنىن عانا مويىندايتىنىن جانە ءوز ارەكەتى ءۇشىن تەك 293-باپپەن قاراۋدى سۇرايتىنىن مالىمدەدى.
نۇربول توقتاۋبايەۆ ءسوزىن جابىرلەنۋشى تاراپتان كەشىرىم سۇراۋمەن باستادى. ول مارقۇمعا اللادان راقىم تىلەپ، تەرگەۋ بارىسىندا كىناسىن جارتىلاي مويىندايتىنىن ايتتى. توقتاۋبايەۆتىڭ ايتۋىنشا، ونىڭ ەشقانداي قىلمىس جاساۋ نيەتى بولماعان، تەك دارحان كومەك سۇراعاننان كەيىن بارعان. ول تەك ەكەۋىن تاتۋلاستىرىپ، دارحاندى الىپ كەتۋدى عانا ويلاعانىن، تۋعان باۋىرى ازامات پەن شىڭعىستى عانا شاقىرعانىن مالىمدەدى. ءوزىنىڭ جابىرلەنۋشى نۇرىموۆتى سابىرعا شاقىرعانىن، قاقتىعىستى بولدىرماۋعا تىرىسقانىن ايتتى. قارۋلى بولعانىن تەرىسكە شىعارىپ، توبەلەس كەزىندە عايىپبايەۆ مىلتىق اتقاننان كەيىن ەكى رەت تەپكەنىن جانە بۇل ءۇشىن كەشىرىم سۇرايتىنىن جەتكىزدى. ول وزىنە تاعىلعان قك 293-باپتىڭ 3-بولىگىمەن كەلىسپەيتىنىن، شەرزاتتىڭ ولىمىنە نۇرىموۆ قارجاۋبايدى كىنالى دەپ تانىپ، وعان قاتىستى قىلمىستىق ءىس قوزعاۋدى سۇرادى.
ازامات توقتاۋبايەۆ ءوز سوزىندە سۋدياعا تىڭداعانى ءۇشىن العىس ءبىلدىردى. ول وقيعا ءتۇنى ۇيىندە بولعانىن، ءۇيقاماقتا وتىرعانىن جانە ءدارىحاناعا بارۋ قاجەتتىلىگى تۋعانىن ايتتى. شىڭعىسپەن تالعارعا بارماق بولىپ، جولدا نۇرقياستىڭ حابارلاسقانىن، ونى الىپ كەتۋگە بارعانىن جەتكىزدى. توقتاۋبايەۆ بۇزاقىلىق جاساۋعا نيەتى بولماعانىن، توبەلەس پەن پىشاق تۋرالى ەشتەڭە بىلمەگەنىن ايتتى. بەتتەستىرۋ كەزىندە نۇرقاناتتىڭ تەرگەۋشىنىڭ «ازاماتتىڭ قولىنان نە كوردىڭ؟» دەگەن سۇراعىنا «بابوچكا» دەپ جاۋاپ بەرگەنىن، ال پروكۋروردىڭ «اس پىشاعى» دەپ كورسەتكەنىن، مۇنى تۇسىنبەيتىنىن مالىمدەدى.
ول وزىنە جالا جابىلعانىن سەزەتىنىن، 7 جىلعا سوتتالۋىن ءومىر بويىنا سوتتالعانمەن تەڭ سانايتىنىن، بۇل وقيعانى ۇلكەن ساباق رەتىندە قابىلداعانىن، ىستەگەن ىسىنە وكىنەتىنىن، ءبىر جاسقا تولماعان بالاسى مەن ۇيدە وتىرعان جارى بارىن ايتىپ، سوتتان ادىلدىك سۇرادى.
كامەلەتكە تولماعان دۋمان ىسقاق ادۆوكاتىنىڭ ءسوزىن تولىق قولدايتىنىن، 4 قازاندا تۇستە عانا وقيعانى بىلگەنىن، سوتتالۋشىلاردى بۇرىننان تانيتىنىن جانە ءوزىن اقتاۋدى سۇرايتىنىن مالىمدەدى.
شىڭعىس بەلعوجايەۆ بولعان جاعدايعا بايلانىستى جابىرلەنۋشىلەردەن كەشىرىم سۇرادى. ول وقيعاعا قاساقانا بارعانىن جوققا شىعارىپ، مۇنداي جاعداي بولاتىنىن بىلمەگەنىن ايتتى. ەگەر ولاردى مىلتىقپەن كۇتىپ وتىرعانىن بىلگەندە، بارمايتىن ەدىك دەدى. ول قارجاۋبايدىڭ “شىڭعىس مەنى پىشاقپەن قۋالادى” دەگەنى جالعان ەكەنىن ايتىپ، مۇنداي جاعداي بولماعانىن، ءوزىن ءبارى باكىنىڭ سابىمەن ۇرىپ جاتىر دەپ ويلاعانىن، ال شىن مانىندە قول جاراقاتىنان جۇدىرىقپەن سوعا الماعاندىقتان، قولىنىڭ شەتىمەن ۇرعانىن ءتۇسىندىردى. ول شەرزات پەن قارجاۋبايدىڭ ارەكەتتەرى بولماعاندا، بۇل جاعداي دا بولماس ەدى دەپ سانايتىنىن ايتتى. بەلعوجايەۆ قارجاۋبايدى قك 293-بابىمەن جاۋاپقا تارتۋدى سۇراپ، 660 ملن تەڭگەلىك وتەماقىنى تولەۋگە توعىز ادامنىڭ ءومىر بويى مۇمكىندىگى جوق ەكەنىن، ءوتىنىشحاتتى قاناعاتتاندىرماۋدى سۇرادى.
نۇرقياس ءىلياسوۆ تا قارجاۋباي مەن مارقۇمنىڭ اناسىنان شىن جۇرەكتەن كەشىرىم سۇراپ، وقيعاعا بارعانىنا وكىنەتىنىن ايتتى. ول شەرزاتتىڭ ءوزىن ۇرعانىن، ال اعاسىنىڭ مىلتىق اتقانىن، ءوزى سويلەسۋ ءۇشىن عانا بارعانىن، ەشقانداي سوعىسۋ نەمەسە قىلمىس نيەتى بولماعانىن مالىمدەدى. ءىلياسوۆ سوتتان ءادىل جازا سۇراپ، شەرزاتقا قول تيگىزبەگەنىن، تەك نۇرقاناتتى ۇرعانىن مويىندادى.
ديدار قالياحمەت توبەلەستى توقتاتپاعانى ءۇشىن كەشىرىم سۇراپ، سەگىز اي بويى اتا-اناسى مەن جارىنا قيىندىق تۋعىزعانىن ايتتى. ول پروكۋرورلاردىڭ ايىپتاۋ اكتىسىن وزگەرتپەگەنىن، ءوزى توبەلەسكە قاتىسپاعانىن جانە دالەلدەر بولماعانىن ايتىپ، سوتتان ءادىل شەشىم سۇرادى.
باستى ايىپتالۋشى ابزال شىناسىل سوتتا قارجاۋبايدىڭ وتباسىنان كەشىرىم سۇرادى. ول بۇل جاعدايدىڭ اللانىڭ سىناعى ەكەنىن ايتىپ، شەرزاتتى ولتىرسە بىردەن مويىندايتىنىن، شىندىقتى ايتقانىن جەتكىزدى. ءوز جاۋابىن نە ءۇشىن وزگەرتكەنىن ءتۇسىندىرىپ، جالعىز قاتەلىگى — نامىسقا بەرىلىپ، كىنانى ءوز موينىنا العانى ەكەنىن ايتتى. ول جازادان قورىقپايتىنىن، ءادىل شەشىم سۇرايتىنىن مالىمدەدى.
قك 106-بابىمەن جازا تاعايىنداۋدى سۇراپ، بارشا قازاق حالقىنان كەشىرىم سۇرادى. ب ا ق پەن الەۋمەتتىك جەلىلەردە ايتىلىپ جۇرگەن «بايدىڭ بالاسى، دەپۋتاتتىڭ بالاسى» دەگەن سوزدەردى جوققا شىعارىپ، جالعىز اناسى بارىن ايتتى. شەرزاتتى ولتىرگەن ءوزى ەمەس ەكەنىن، كىمدىكى ەكەنىن ايتا المايتىنىن ايتىپ ءسوزىن قورىتىندىلادى.
