شەرزات بولاتتىڭ ءىسى بويىنشا العاشقى سوت وتىرىسى قاشان وتەتىنى بەلگىلى بولدى، دەپ حابارلايدى Dalanews.kz.
ادۆوكاتى مەيىرمان شەكەيەۆتىڭ سوزىنشە، سوت وتىرىسى 10 ساۋىردە تالدىقورعان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا وتەدى. سەبەبى، ءقازىر كۇدىكتىلەردىڭ كوپشىلىگى وسى قالاداعى ۋاقىتشا ۇستاۋ يزولياتورىندا وتىر.
ەسكە سالايىق، بۇعان دەيىن تالعارداعى جانجال كەزىندە كوز جۇمعان شەرزات پولاتتىڭ اكەسى قارجاۋباي نۇرىموۆ بالاسىنىڭ ولىمىنە قاتىسى بار دەگەن كۇدىكتىلەرگە قاتىستى قوسىمشا ارىز دايىنداپ جاتقانىن حابارلاعان ەدىك. بۇل تۋرالى جابىرلەنۋشى تاراپتىڭ جاڭادان قوسىلعان ادۆوكاتى مەيىرمان شەكەيەۆ مالىمدەدى.
– ءىس ماتەريالدارىمەن تانىسا كەلە، ءبىز بۇل قىلمىستىق ءىس اياسىندا ازاماتتىق تالاپتىڭ بەرىلمەگەنىن انىقتادىق. ءقازىر سول تالاپتى ازىرلەپ جاتىرمىز. بۇل ارەكەت قارجاۋباي مىرزاعا قارجىلاي وتەماقى الۋ ءۇشىن ەمەس، قاماۋدا وتىرعان كۇدىكتىلەرگە ۇكىم شىققان سوڭ ولاردىڭ مەرزىمىنەن بۇرىن بوساپ كەتۋىنە جول بەرمەۋ ماقساتىندا جاسالىپ وتىر، – دەدى شەكەيەۆ.
“وقيعا ورنىندا بولعان ەكى قىز قايدا؟”
ادۆوكات قوعامدا قىزۋ تالقىلانعان ءبىر سۇراققا دا جاۋاپ بەردى.
– حالىقتى الاڭداتىپ وتىرعان ماڭىزدى سۇراقتاردىڭ ءبىرى – وقيعا ورنىندا بولعان ەكى قىزدىڭ تاعدىرى. ولار الەۋمەتتىك جەلىلەردە كۇدىكتى رەتىندە كورسەتىلگەنىمەن، ءىس ماتەريالدارىنا سايكەس، تەك كۋاگەر رەتىندە جاۋاپ بەردى، – دەدى قورعاۋشى.
مەيىرمان شەكەيەۆتىڭ ايتۋىنشا، بۇل قىلمىستىق ءىس بويىنشا 9 ادام كۇدىكتى رەتىندە تانىلعان. سونىڭ ىشىندە بىرەۋى – كامەلەت جاسىنا تولماعان. وعان قىلمىستىق كودەكستىڭ 434-بابى — قىلمىس تۋرالى حابارلاماۋ بويىنشا ايىپ تاعىلعان. ال جابىرلەنۋشىلەر سانى – التى. ولاردىڭ ەكەۋى – شەرزات پەن نۇرقانات.
